B Lalthangliana thil hlui lak khawmte vawn ṭhat turin HBC hnenah a hlân

Mizo historian B Lalthangliana chuan Mizo chanchin leh thu leh hlaa zirna kawng hrang hranga lehkhabu leh thil hlui a lak khawm tawhte chu nimin khan Hrangbana College hnenah a hlan. A thilpekte dah khawmna atana HBC-in College Library Archive Room-a an siam chu nimin khan B Lalthangliana hian a hawng nghal bawk.

B Lalthangliana hi Hrangbana College-ah kum 24 chuang zirtirtu hna thawk tawh a ni a; Archive Room hawnnaah hian B Lalthangliana chuan, Mizo chanchin zir chiang tura bul a ṭan dante sawiin, thu leh hla leh hnam nun inzawm thil hlui leh hlu tak tak a lâk khawmte chu uluk zawka vawn ṭhat zel a nih theih nan HBC Archive-ah phal taka a pek thu a sawi.

HBC -a kawl ṭhat tura B Lalthangliana'n a pekte hi history, culture leh literature huanga zirbingmite tana ṭangkai thei tur a nih avangin a duh apiang tan hman ṭangkai theih tur a nih thu an tarlang. Lehkhabu leh thil hlui hrang hrang inhlannaah hian HBC Principal, Vice Principal, Mizo department zirtirtute leh zirlaite an tel.

B Lalthangliana hi Vanglaini buatsaih Mizo Award 2025 dawngtu a ni a, MAL Book of the Year ṭum hnih a dawng tawh bawk.