Champhai College-in Chamdel Kût hmang; HM-in hmasawn zel tum turin zirlaite a fuih
Champhai College chuan nimin khan an din champha leh Chamdel Kût an hmang a, minister K Sapdanga'n a hmanpui. Minister chuan, zirlaite'n an elpui berte chu mahni ṭheuh an nih avangin ni tin hmasawn zel tum turin a fuih.
Champhai College din champha lawmna leh Chamdel Kût hmannaah hian Ministrer-in thu a sawi bakah, hnam lâm entir a ni a, Departmental Show neih niin, College-a department hrang hrangte an inel a, Kut Lengi leh Vala atana thlante hnenah lawmman hlan a ni.
Minister K Sapdanga chuan, zirlaiin a el ber tur chu a zirlaipuite ni loin, amah a nih thu a sawi a, "Nimin aiin vawiinah hmasawn kan tum tur a ni a, ni tin hmasawnna thar neih kan tum tur a ni. Fing zawk, chak zawk leh inthununna ṭha zawk nei turin ni tin hun ṭha kan nei a, kan hun ṭha neih hi hmasawn nan hman kan tum tur a ni," a ti.
Khawvel chak takin a inthlak danglam tih sawiin Sapdanga chuan, "Artificial intelligence, digital technology, sik leh sa inthlak leh thil dangte'n kan nunphung leh hna chi hrang hrang thawh phung a thlak danglam a, tunah chuan degree nei ringawt hi hlawhtlinna a ni tawh lo a, a taka hna thawk thiam nih a ṭul," a ti a; khawvel inher danglam zel mila insiamrem thiam turin zirlaite a chah.
Home Minister a nih angin tunlaia ṭhalaite'n chona an hmachhawn mek a hriatpui thu sawiin Sapdanga chuan, "Damdawi hmansual, online hmanga inbumna leh pawikhawihna, thu dik lo thehdarh leh khawtlang nun atana thil hrisel lo tam tak a awm a, hengte hian ṭhalai duhawm tak takte nun a tiderthâwng mek a ni," a ti a; harsatna hrang hrang laka inven nan zirna a pawimawh thu a sawi.
Mizote'n tlawmngaihna an neih ṭhat thu sawiin, tlawmngaih chhawm nungtu ni zel turin Minister chuan zirlaite a fuih a, "Hun remchang ṭha hi amaha rawn kal mai tur a ni lo a, keimahni'n kan siam a ngai a, kan hma lam hun hi keimahni insiam tur a ni. Ngaihtuahna thar ṭha kan neih zel a ngai a, technology-te hi fing taka kan hman a ngai," a ti a; hmasawnna kawng an zawhnaah Mizo ṭawng, hnam nunphung leh chin dante vawng nung zel turin a chah.
K Sapdanga chuan, an hun hman chu Champhai College din champha lawmna ringawt ni loin, College-in mi puitling chher chhuak tura a inpekna tihchak tharna a nih thu a sawi a, "Champhai College hian mi ropui tak tak, sorkar, zirna, hriselna lam, venhimna lam leh thil dang danga Mizoram tana mi hlu tak tak a lo chher chhuak tawh a, hei hi ram tan a hlu em em a ni," a ti.
Champhai chhuak a nih thu sawiin Sapdanga chuan, "Champhai district hi ram ṭha, theihna sang tak nei a ni a, mipuite pawh hna thawk nasa tak tak an ni," a ti a; Champhai district tihmasawntu nih tum tur leh pipute thil hlu tak tak awmte vawng himtu nih tum turin mipui a chah.
Home Minister chuan, Champhai College zirtirtute chu ni tin inpekna thar nen an hna thawk a, mi puitling leh ram tana mi chhuanawm tak tak chher chhuah zel tum turin a fuih a, "In kutah Mizoram hma lam hun hi thui tak a innghat a ni," a ti. Zirlai nu leh pate chu an fate hlawhtlinna an kutah a innghat a nin tih hria a, an zirna ngai pawimawh turin a fuih bawk.