Adhoc H/S awmna khuaah kawng zawh; Rules thar sût hma chuan sikul khâr tum

Mizoram Govt. Adhoc Aided High School Teachers’ Association (MIGAHTA)-in an sikulte provincialise phûtin nimin khan khaw hrang hrangah kawng an zawh. Aizawl South-III leh Lunglei district-a adhoc high school-te chuuan rules thar sût a nih hma chuan an sikulte khâr an tum.

MIGAHTA-in adhoc grant-in-aid high school-te dinhmun hniam zawka dahna nia an hriat ‘The Mizoram Education (Lumpsum Grants-in-Aid for General Maintenance of Private School) Rules, 2026’ an duh lohzia lantir nan adhoc H/S awmna khaw hrang hrangah nimin khan kawng zawh a ni a, zirtirtu, zirlaite leh khaw mipui an tel.

MIGAHTA tarlan danin, The Mizoram Education (Lumpsum Grants-in-Aid for General Maintenance of Private School) Rules, 2026 hi nimin khan khaw eng emaw zatah hâl a ni bawk.

Aizawl South-III huam chhunga adhoc H/S awmna khuaa VC, Managing Committee, tlawmngai pawlte leh ZPM unit aiawh kalkhawmte chuan, ‘The Mizoram Education (Lumpsum Grants-in-Aid for General Maintenance of Private School) Rules, 2026’ sût a nih hma loh chuan an bial chhunga adhoc H/S-te chu an khâr an rêl. Lunglei district-a adhoc H/S awmna khaw hrang hranga managing committee-te pawhin Rules thar sût a nih hma chuan an sikulte khâr rih an tum bawk a ni.

MIGAHTA chuan, sorkar laka lungawi lohna an lantir mekah sorkarin thawktute hlawh sang zawk pek a tiam chu an lawm rualin, sikul dinhmun a tlakhniam dawn ai chuan an hlawh pung tur an hnar thu an sawi a, "Kan hmalakna hi zirtirtu dinhmun tlahniam tur vawn himna leh ṭhangthar hna zawng mekte hmakhaw ngaih vang a ni tih min hriatsak turin Mizoram mipui kan ngen a ni," an ti.