MZP vangin exam/interview turte leh kaisang turte'n harsatna an tâwk - MPSC

Mizoram Public Service Commission (MPSC) chuan thuchhuah siamin, one time registration (OTR) leh MPSC kalphung ṭhenkhat chungchangah MZP-in MPSC-a thawkte pisa kai tur an dan avangin personal interview hmachhawn mek te, written exam nei turte leh officer kaisang turte'n harsatna an tawh phah tih an tarlang.

MPSC chuan, MZP aṭanga ngenna an dawnte chu August 7, 2026 khan chhanna an tichhuak tih an tarlang a, "MZP-in ni hnih chhung MPSC office tualah lungawi lohna a lantir hnuah duhtâwk mai loin, vawiin (August 10) aṭanga MPSC hnathawkte pisa kai tur an dang hi MPSC chuan pawi a ti hle. He thil thleng vanga personal interview hmachhawn mekte leh written exam bei turte'n harsatna an tâwk te, officer kaisang tur a hun taka an kaisang thei lo turte hi pawi kan ti em em a ni," an ti.

MPSC chu hna diltute tana harsatna siam tumtu ni loin, recruitment process dik leh langtlang, danin a phal ang taka kalpui tumtu a nih reng thu sawiin, "MZP-in OTR hi tihtawp a, advertisement tihchhuah thar apiangin specific application form siam ni se, a tih hi MPSC chuan a pawm thei lo, OTR tihtawp hi candidate-te harsatna chinfelna aiin harsatna thar siam thei zawk a ni," an ti a; tunah chuan MPSC tan OTR tihtawp a remchang lo tih an sawi.

MZP-in OTR-a document upload kim loh vanga application hnâwl tawhte tan offline-a document thehluh hun pek an dil chu candidate ṭhenkhat tan thil ṭha tak ni thei mah se, recruitment process pumpui thlirin tihhlawhtlin theihah an ngaih loh thu MPSC chuan a tarlang a, "Recruitment process-ah advertisement leh application submission hun bithliah hi candidate tin tan a thuhmun vek tûr a ni. Application hun khâr hnuah candidate ṭhenkhatte tan document kim lo thehluh hun hranpa siamsak leh hi candidate document felfai taka thehluttute tan thil dik lo tak a ni dawn a ni," an ti.

MPSC chuan, written examination-a ti ṭha si, OTR-a document upload kim loh vanga hnâwlte chungchangah, "Written examination-ah eng ang pawhin ti ṭha mah se, dilna famkim lo thehlutte chu eng hunah pawh hnâwl theih an ni," an ti a, chu chu advertisement-ah langsar taka ziah lan zel a nih thu an tarlang.

Online portal thar (Version 2.0)-a account hawn thar dan, OTR siam dan, document upload dan, etc. chungchanga hna diltute kaihhruaina (public notice) chu June 17, 2025-ah MPSC website, Facebook page leh Instagram account-ah te a zau thei ang bera thehdarh a nih thu leh, IPR website-ah pawh tihchhuah a nih thu an sawi bawk.

MPSC TARLAN DANG

☑ Version 2.0 hman a nih avanga harsatna hriat hmasak ber, MAHVS candidate zinga OTR-a document dah kim lo mi eng emaw zat an awm a, interview hmain hnâwl an ni. Hnâwl tâkte hi court-ah an kal a, vawiin thlengin result tihchhuah theih a ni lo.

☑ Court-a thu inchiah mek a nih avangin tuna harsatna tâwkte hi lainatawm viau mah se, ‘last date for submission’ a pelh hnuah a tira an thehluh loh document dang thehluh leh theih hun siamsak bik a rem lo.

☑ Court-a zualko mekte leh tuna harsatna tâwk tharte chungchang hi huang khata hlûm tur a nih avangin court thuchhuak a awm hma chuan MPSC tan kawng danga hmalak a rem lo.

☑ Advertisement tihchhuah apiangin dilna famkim lo thehluttute chu eng stage-ah pawh an dilna hnâwl theih a ni ang tih ziah lan zel a ni; candidate tam takin written exam zawha document an upload kim loh vanga hnâwl an nih hian an hrethiam thei lo.

☑ MPSC chuan application initial stage-a document-te 100% check thei turin sorkarah a mamawhte a thlen a, July 28, 2026 khan post pakua a pek belh bakah, post 26 dang sorkarin pek belh turin hma a la mek.

☑ Thawktu thar lak belh an nih hnuah chuan application-te a tirah 100% check theih tawh tura beisei a ni a, hei hian tuna candidate-te harsatna neih ang chi pawh a sutkian rin a ni.

☑ MPSC online portal nasa taka tihchangtlun chhoh a ni a, tuna buaina awm mek ang chi hi chu hun rei lo te hnuah a kiang thuai tura beisei a ni.