MPSC-ah MZP leh Police an innawr; MZP-in MPSC dan chhunzawm an tum

MZP chuan Mizoram Public Service Commission (MPSC)-in hna a lak dan siamṭhat phûta sorkar an karnaah nimin khan MPSC-a thawkte pisa kai tur an dang a; police-te nen innawr mah se, hliam na an awm lo. MZP hian vawiinah pawh MPSC-a thawkte pisa kai tur an dang leh dawn.

MPSC-in sorkar hna thawk tur lak a buaipuinaa hna zawngtute'n harsatna an tawh ṭhinte leh hna lak dana thil fel lo awm nia an hriatte siamṭhat phûtin MZP Gen. Hqrs chuan August 6-7, 2026 chhung khan hnatlang an lo ko tawh a ni.

An thil phûtte sorkarin a tihhlawhtlin loh avangin MZP chuan nimin khan MPSC-a thawkte pisa kai tur an dang a, police-te'n MPSC hotute pisa kaitir tura hruai an tum chu MZP hruaitute'n dan an tum a ni. Police-te chuan MZP hruaitute chu MPSC pisa kawt aṭangin hian nawr chhuak a, an innawrnaah pisa luhna kalkawnga tlak dâl (railing) an nêk chhia.

MZP hruaitute chuan nimin tlai khan an pisaah thuthar thehdarhtute an kâwm nghal a; MZP president C Lalremruata chuan, police-te chêt dan chu mak an tih thu sawiin, "Hetianga police-te'n tharum thawhna an lantir leh MPSC Chairman leh Secretary bakah officer leh staff-te'n police tha chakna hmanga zirlai mahni dikna chanvo phûta kan chêtna min pal lui hi kan dem tak zet," a ti.

MPSC-a harsatna tâwk mi ṭhenkhatin MZP chu hma lakpui tura an sawm thu leh MPSC thuneitute nen vawi eng emaw zat an sawiho tawh thu sawiin C Lalremruata chuan, MZP leh college student union, hnam pual zirlai pawl leh hna zawngtute nen hma an lak zel dawn thu a sawi.

MZP President chuan, police-te'n tharum thawhna an lantir chu an dem thu a sawi a; MPSC Chairman leh Secretary bakah, officer leh staff-te'n police tha chakna hmangin MZP an pal lui nia sawiin, an dem tak zet thu a sawi bawk.

MZP PRESIDENT SAWI ṬHENKHAT

* MPSC pisa kai tur dan a nih mek laiin magistrate-te kaltlangin inbiak an rawn rawt a, MZP chuan MZP OB bakah college SU leader, aspirant, joint hnampual hruaitute nen inbiak ni se kan ti a, magistrate lamin inbiakna hmun atan Sports Directorate an bia.

* Punkhawmna hmuna MZP President anga thu ka sawi zawhah MPSC Joint Controller of Examination-in min rawn biak buai lai takin Chairman leh Secretary bakah, officer leh staff-te MPSC office-ah police tha chakna hmangin luh luih an tum.

* Police-te hian kawngka an hawnsak a, luh phal loin kan dang ve bawk a, kan innawr.

* Kan innawr a ziaawm deuh a, MPSC Chairman pawh kal kian a tum lai takin zirlaite lam hawiin bán ka phar a, 'Kan CM-in zirlaite kutthlak leh an chunga tharum thawh hi ka duh lo' tia a sawi ṭhin ka sawi lai takin kan inring lo lai police-te'n min nawr.

* Inbiakna nei tura kan inruahman laia MPSC pisaa luh an tum hi eng nge tih an tum a, eng rilru nge an put? Protester-te bulah hian MPSC Secretary hian insawithiam a tum a mi tih hi kan zawhna a ni.

* Sorkarin inbiak a duh chuan kan inpeih reng, mahse, kan thil phûtte a la ngai reng.