Doctor-te mawhphurhna zirho a ni

Doctors Against HIV & AIDS (DAHA) leh Mizoram State AIDS Control Society (MSACS) te chuan August 7, 2026 khan National HIV/AIDS & STD Control Programme hnuaia doctor-te mawhphurhna leh hmalak dan tur zir chianna Hotel Floria-ah an buatsaih.

MSACS project director Dr Jane Rinsangi Ralte chuan, India rama HIV High Priority thlan zingah Aizawl district a sán ber a, 4.7% a nih thu a sawi a; Mizorama HIV kai zat chu kum 2017-ah a san ber thu sawiin, "Mizoram district zawng zawngte hi High Priority District vek a ni a, tunah hian hniam lam a pan zel," a ti.

DAHA chairman Dr C Lalhrekima'n DAHA chu Indian Medical Association (Mizoram Chapter) leh Mizoram Govt. Doctor Association (MGDA) ten Mizorama HIV donaah hmasawnna chak zawk a awm theih nan an din a nih thu a sawi a, "Tunah hian college leh institution hrang hrangah MSACS nen ṭang dunin comprehensive health checkup kalpui mek a ni," a ti.

MSACS joint director Dr Lalnunhlima Khiangte-in Elimination of Vertical Transmission of HIV & Syphilis chungchang a sawifiah a; nu nau paite'n HIV an vei leh vei loh endik a pawimawh thu a sawi. MSACS joint director Dr Richard CLR Hluna'n thupui dangte a sawi bawk.