Delhi-ah 'MadebyMizo Kiosk' hawn a ni

Chief minister Lalduhoma chuan August 7, 2026 khan New Delhi-a 102 Humayunpur, Safdarjung Enclave-ah Mizoram Handloom & Handicrafts Development Corporation Ltd. (ZOHANDCO) hmalaknaa din 'Madeby-Mizo Kiosk' a hawng.

MadebyMizo Kiosk hi Mizo siam thil chi hrang hrang zawrhna a ni a, Ministry of MSME hnuaia RAMP scheme hmanga din niin, Delhi-a MadebyMizo Kiosk hi square feet 750-a zau, cheng nuai 71.41 sênga din a ni.

Marketing Intervention hnuaiah hian ZOHANDCO chuan MadebyMizo.com (e-commerce) platform a tlangzarh tawh a; he e-commerce-a Mizote siam bungrua an ziah luhte chu zawrh chhuah a nih theih nan MadebyMizo Kiosk din a ni. New Delhi bakah hian Bengaluru leh Kolkata-ah te din turin ZOHANDCO chuan hma a la mek.

Chief Minister chuan, Mizorama public sector undertaking (PSU)-te chu sorkar tan phurrit an nih ṭhin thu a sawi a, "Kan sorkar hnuah siamṭhat hna nasa takin kan thawk a, tun hnaia ZOHANDCO hmasawn dan hian chu chu a lan chiantir hle a ni," a ti.

MadebyMizo Kiosk aṭang hian bungrua hralh chhuah a ni dawn a, e-commerce aṭanga online order awmte chu Aizawl aṭanga thawn vek loin, kiosk aṭangte hian an pe chhuak thei dawn. RAMP scheme-ah hian ZOHANDCO chu state nodal agency a ni a, scheme-a component pakhat - marketing intervention bikah mawhphurhna a la a ni.