Bazara thil lei a dik leh dik loh enfiah

Mizoram Consumers’ Union (MCU) chuan August 8, Inrinni zing khan Dawrpui Taxi Stand-ah Mobile Consumer Checkpost an buatsaih a; mipuiin thil an leite a bûk a dik leh dik loh leh, a man dik tak - maximum retail price (MRP)-a an lei leh lei loh te an lo enfiah a, consumer-te hriat tur pawimawhte an zirtir bawk.

MCU chuan, Consumer Protection Act, 2019 chuan consumer chu 'mi tu pawh, sum senga bungrua emaw, service emaw leitu leh hmangtu zawng zawngte' tia a hrilhfiah thu an tarlang a, "Hralh chhawn tura leitu leh sumdawngte a huam ve lo. Services tih hian electric connection, courier leh post service, bank, insurance, airline leh taxi, private hospital service leh a dangte a huam a, consumer-te hian right/chanvo paruk kan nei," an ti.

Thil leitu (consumer)-te dikna chanvote palzût a nih chuan District Commission/State Commission-ah complaint thehluh theih a nih thu MCU chuan an tarlang bawk.

CONSUMER DIKNA CHANVO
* Bungrua/service him lo leh fel lo laka consumer-te venhim
* Thil lei tur ṭhat dan, a tam lam, a man zat, a thianghlim/tak dan, etc. hrilhfiah
* Consumer-in zalen taka duh thlan theihna leh a duhzawng an lei theih
* Consumer-in a thil leia a lungawi lohnate a thlenin Consumer Court/Comission-in lo ngaihthlaksak
* Consumer-in a thil leia lungawi lohna a neihin pawisa emaw, a thawi dam leh zangngadawmna ngaihtuahsak tura phût theihna
* Consumer-te hnena an dikna leh chanvo hrilhfiah