MNF-in pawndum nen CM haw an hmuak; CMO-ah ngaihdam dil tura phûtna an târ

August 8, Inrinni khan Mizo National Youth Front (MNYF) bultumin MNF-te'n Chief Minister's Office (CMO) luhna gate bulah chief minister Lalduhoma Delhi zin haw an lo hmuak a; hmuak chhuak lo mah se, CMO kawngkharah a thusawi avangin ngaihdam dil tura CM an phûtna lehkha an târ.

MNF-te hi chawhma dar 11 velah an kal khawm ṭan a; MNYF president Gogo Lalremtluanga chuan thu sawiin, CM Lalduhoma chu n kum 40 vel politics-ah a awm tawh thu a sawi a, "A thil tawn tawh aṭangin Mizo mipui harsatna leh duh dan a hre tawh tura kan ngaih laiin, vawiinah kan ṭhalai rualte rilru kaihruai sual thei tura dâwt thu a sawi duh leh ILP chungchanga Mizo mipuite tithlabar zawnga thu a sawi duh hi pawi kan ti. Mizoram CM awm tawh zawng zawngah CM dawihzep ber a ni," a ti.

Gogo Lalremtluanga chuan, enchhin sorkar chu duhsakna nen an kal nia sawiin, "Buhfai man an tito a, oil man an tisang a, kalphung thar a lawm tiin mipuite'n an la ngaidam. Kum hnih leh a chanve vel an sorkar a, Mizoram dung leh vângah kawng a chhe em em a, restricted tender pe tam ber an ni. Zrtirtute'n sorkar notification an hâl a, ṭhalaite MPSC tualah an pungkhawm," a ti a; mipuite an beidawng niin a sawi.

MNF-te hian Chief Minister an hmuak chhuak dawn loa an hriat avangin August 15, 2026 hmaa a thusawi sût tur leh ngaihdam dil tura an phûtna lehkha CMO-ah pek an tum a, police-in luh an phal loh avangin hun rei vak lo an innawr. A hnuah hruaitu mi 15 vel luh phalsak an ni a, lehkha dawng duh an awm loh avangin CMO kawngkharah an târ. Chumi hnuah an ṭîn darh a ni.

MNF-te hian pawndum an bah bakah thuziak hrang hrang - 'Dâwt sawi level sang CM atan kan duh lo' tih te, 'Kohhran upa CM dâwt sawi hmang kan duh lo' tih te, 'Dawihzep taka ram hruai ai chuan bâng mai la' tih te, 'CM kan neih tawh zinga dawihzep ber Lalduhoma' tih te, 'BJP tlawn nan ILP hralh kan remti lo' tih leh tih a dangte an keng a ni.