World's Indigenous Peoples Day hmang

Zo Re-unification Organization (ZORO) chuan August 8, Inrinni khan Aizawlah International Day of the World's Indigenous Peoples an hmang a, Millennium Centre aṭanga Vanapa Hall thleng Zo thuam inbela kawng an zawh bakah, Vanapa Hall-ah inkhawm an buatsaih.

International Day of the World's Indigenous Peoples hi August 9 a ni a, kuminah Pathianni a nih avangin Inrinni khan hman a ni. Thupui chu 'Indigenous Peoples and AI: Defending Rights, Shaping Futures' tih a ni a, Art & Culture minister C Lalsawivunga'n a hmanpui.

C Lalsawivunga chuan, United Nations (UN)-in tualṭo hnamte a ngaih pawimawh thu a sawi a, "British ram aṭanga zalenna India-in a hmuh hnuah Zo fate ram hrang hrangah ṭhen darh kan ni a, political boundary avangin ram hrang hrangah Zo fate kan awm mek. Ramriin min daidang mah se, Zo hnahthlak unau kan nihna erawh chu ramriin min ṭhen hrang lo se," a ti a; thinlungah Zo fa nihna vawn tlat a pawimawh thu a sawi.

Minister chuan, "Ram hrang hrang, sorkar hrang hrang hnuaiah Zo fate awm mah ila, mahni awmna hmun aṭang ṭheuhin kan nihna identity hre reng chungin inpumkhatna leh inunauna nghet lehzual nei tuin hma lam i pan zel ang u," a ti a; kal khawmte chu hmun hrang hranga Zo fate nen inkungkaihna ṭha nei tura hma la zel turin a fuih.

Khualzahawm Robert Romawia Royte, MLA pawhin thu sawiin, Zo fate chu an nihnaa chiang turin a fuih a, "Chi bil leh hnam bil nei mah ila, insuihkhawma inunauna nei zel tur kan ni. Khawvel ṭhang zelin a ken tel technology leh social media-te chu hmang ṭangkaiin, insuihkhawmna hmanrua atan hmang zel ang u," a ti.

Inkhawm hi ZORO vice president L Ramdinliana Renthlei-in a kaihruai a; president R Sangkawia pawhin thu a sawi. Zirlaite'n Zo thuam chi hrang hrang an entir a, Zonunpar Cultural Club leh MCO Performing Troupe ten hnam lâm an entir bawk.