AMC study team-te report thlirho

Aizawl Municipal Corporation (AMC) hotute chuan nimin khan AMC conference hall-ah AMC hmalakna (subject) hrang hrang zir chiang tura an din study team-te report an thlirho a, Aizawl mayor H Lalremtluanga'n a kaihruai.

Aizawl Mayor chuan, study team-te'n a hun taka report felfai leh ṭha tak an buatsaih chu lawmawm a tih thu a sawi a, "Rawtna hrang hrang lutte hi AMC hmasawnna atan ṭangkai tak a ni dawn a, chak taka bawhzui a, tihhlawhtlin ngei tum a ni ang," a ti.

Report-te chu building permit, parking area, lei laih permit, street light, vending zone, hoarding & licensing, slaughter house, vawk vulh chungchang leh bawlhhlawh paih dan mumal leh hmasawnna tur chungchang a ni a; study team member secretary-te'n an zir chian dan leh rawtna an neihte an sawifiah. Sawiho nghal a ni a, AMC Executive Council ṭhutkhawma pharh turte an siam a ni.

Study team-te rawtna chu AMC hna kalphung siam ṭhatnate leh Aizawl mipui tan hmalakna ṭha zawk kalpui theihna turte a ni a, Executive Council-in a pawm hnuah hmalak nghal zung zung ni se, an ti.

AMC sorkar hian sorkarna an chelh hnu lawkah chak zawk leh mipui tan ṭha zawka hna an thawh theih nan AMC subject hrang hrang zir chiangtu tur study team 12 a din a; team tin chu executive corporator-te'n an kaihruai a, member secretary chu AMC-a officer-te niin, member-ah corporator leh AMC-a thawkte an tel a ni.