Mizoramin Food Testing Laboratory a mamawh thu FSSAI hnenah thlen

Health minister Lalrinpuii chuan nimin khan Food Safety and Standards Authority of India (FSSAI) chief executive officer (CEO) Rajit Punhani chu FDA Building, New Delhi-ah a kâwm a; Mizoramin Food Testing Laboratory changtlung zawk a mamawh dan a sawipui.

Lalrinpuii chuan, Mizoram chu mi cheng zata chhûtin India rama cancer tamna ber state a nih mek thu a sawi a, "Ram changkang zawkte anga kan ei leh in tur - thlai leh thei hrang hrangah mihring tana ṭha lo chemical residue a awm leh awm loh uluk taka endik reng kan mamawh," a ti.

Ei tur siam license pek theihna tur tawk vel laboratory mai ni lo, mipui ei leh in tur zawng zawng, siam sa leh siam lohte thlenga a him leh him loh hriat theihna tur endikna ṭha leh endikna laboratory ṭha Mizoramin a mamawh thu Minister chuan FSSAI CEO a hrilh a ni.

FSSAI CEO chuan, ei tur himna pawimawhzia hriaa Mizoram mamawh Health Minister-in a thlen chu lawmawm a tih thu a sawi a, "Laboratory ṭha zawk neih theihna turin ruahmanna leh ṭul dangte ngaihtuah ula, technical team a rang lamin Mizoramah rawn tirh ka tum ang," a ti.

FSSAI-in in (building) sakna a tum thei lo a, state sorkarin laboratory building tur a neih a ngaih tur thu Rajit Punhani chuan a sawi a, "Ruahmanna awm sate a hmunah rawn en chiantir ka tum ang," tiin, a rang thei ang bera hmalak a tum thu a sawi.

Minister Lalrinpuii hi Health secretary Lalzarmawii leh NHM officer on special duty Dr Hmingthankimi ten an ṭawiawm a ni.