Tum mumal nei turin zirlaite chah

T Romana College chuan nimin khan Dawrpui Multipurpose Hall-ah zirlai lut tharte lawmna leh kal chhuak turte thlahna, 'Fresher Social cum Graduation Day' an hmang a; khuallian minister PC Vanlalruata chuan, tum mumal nei turin zirlaite a chah.

PC Vanlalruata chuan, T Romana College-in Mizoram University under graduate exam-a rank holder 11 an nei chu a lawmpui thu sawiin, zirtirtute leh zirlaite thawhrimna fakawm a tih thu a sawi a; zirlaite chu taima leh rinawm taka zir zel tur leh, tum mumal tak nei turin a chah a ni.

Inkhawmah hian Minister-in TRC annual magazine 'Raltiang' a tlangzarh a; kumin MZU UG exam-a an college aṭanga rank holder 11 hnenah chawimawina hlan a ni.

T Romana College-ah hian 2026-27 academic session-ah zirlai thar 356 awmin, graduate thar 252 an awm a; zirlai 956 an awm mek.