ELF atan zirtirtute training buatsaih

Lunglei District Education Office leh Disha Foundation, Chennai chuan Lunglei district-a primary school zirlaite'n English bulṭhut thiamnaa hma an sawn theihna tura English Language Foundation (ELF) 2.0 an kalpui turah nimin khan School Education Complex-ah zirtirtute pualin training an buatsaih a, bawrhsap Navneet Mann-i'n a hawng.

ELF 2.0 hi Lunglei district-a sorkar primary school 11-ah kalpui tur a ni a; Disha Foundation-in hmanraw chi hrang hrang - teaching aid, workbook leh video-te an tum a, chumi hmang chuan zirtirtute'n an sikulah zirlaite an zirtir dawn a ni. Kum 2026-27 first term exam zawhah kalpui ṭan tur a ni a, zirlaite hmasawn dan fiah nan a khât tâwkin test buatsaih ṭhin a ni ang.

Navneet Mann chuan, ELF 2.0 chu a thawh khatna ang bawka a hlawhtlin a beisei thu a sawi a, "A hlawhtlinna atan zirtirtute an pawimawh hle dawn," tiin, an zirlaite an zirtir hunah zirlaite'n an sâwtpui ngei theih nan theihtawp chhuah turin a chah.

Lunglei DC leh Disha Foundation, Chennai aiawhte chuan ELF 2.0 kalpui tur hian nimin khan thawhhona thuthlung an ziak nghal bawk.