Indian Organ Donation Day hman a ni

Nimin kha Indian Organ Donation Day vawi 16-na a ni a, Directorate of Hospital & Medical Education (DHME) Auditorium-ah Mizoram State Organ & Tissue Transplant Organisation leh DHME ten an hmang.

Indian Organ Donation Day hmannaah hian Health & Family Welfare principal director Dr Lalthlengliani khuallian a ni a, thupui chu, 'Organ Donation Life-Saving Campaign' tih a ni.

Civil Hospital, Aizawla surgeon Dr Zothansanga Ralte-in mi dang tana taksa pêng pek (organ donation) chungchang a sawifiah a, "Mi pakhatin a thih hnuah a taksa pêng hrang hrangte hmangin mi pariat nunna a chhan thei," tiin, mi 75 vel tan nun nuam leh hahdam zawk a thlen theih thu a sawi.

Mamawhte hnena taksa pêng pek chu India ramah ti an tlem thu sawiin Dr Zothansanga chuan, "Mamawh an tam si a, organ donate tura inzirtirna kan uar a ngai. Taksa péngah hian kan dam laiin kal (kidney), thin (liver), vun leh ríl (pancreas/intestine)-te a inpek theih a, thih hnuah taksa pêng tam zawk inpek theih a ni," a ti.

Dr Zothansanga Ralte sawi danin, India ramah kum tin kal (kidney) thlak ngai mi 2,00,000 vel an awm ṭhin a, mi 7,500-10,000 (5%) vel chauhin thlakna tur an hmu ṭhin a ni.

Mizoramah kal thlak theih thuai beisei a ni a, Civil Hospital, Aizawlah kal thlak lama thiamna nei doctor (nephrologist) a awm a, licence an nei tawh a, surgical team turte zirtir mek an ni. Thin (liver) thlak thiam (gastroenterologist) pakhat a awm tawh a, surgical team erawh an la awm lo.

Organ donor ni turin NOTTO web portal notto.abdm.gov.in ah inziah luh theih a ni a; kum 18 chin chung lam, mahni duhthlanna ngeia organ/tissue mi dang hnenah nunna chhan nan emaw, natna enkawl dam nan emaw pek theih a ni.

Organ Donation Day-ah hian DHME director Dr Zonunmawii Pachuau-in inlawmna thu a sawi a; additional director Dr ST Lalruatfela'n day thupui sawizauna neiin, Civil Hospital Aizawla opthalmologist Dr Zoremmawii'n eye donation chungchang a sawifiah. Khuallian kaihhruaiin organ donation ti tura thutiam lak a nih bakah, organ donation ti tawh leh organ dawng tawh mi pakhat ve vein thu an sawi bawk.

ORGAN DONATION

* Natna emaw, chetsualna emaw vanga thluak thi (brain stem death) leh lungphuchâwl (cardiac arrest)-te chuan kum bithliah awm loin an organ/tissue an pe thei a, an chhungte remtihna lak ngei a ngai.

* Mihring dam laiin a thisen zawmpui - nu/pa, unau, pi/pu, nupui/pasal leh a tute a pe thei.

* Chhungte nena organ inmil lo a awm chuan dan hnuaiah mi dangte nen taksa peng thlak ngai an inthleng thei.

* Miin a duhthlanna leh eng emaw inzawmna vang te, chhan ṭha tak vangtein thisen zawmpui ni lo hnenah taksa pêng a pe thei. Hetiangah hian transplant tihna hmun tur hospital authorisation committee phalna a ngai thung.

* Authorisation committee awm lohna damdawi-inah chuan district/state authorisation committee-in a hriatpui/pawmpui thei.

* Dan loa taksa khawl leh tissue la chhuakte chu kum 10 thleng tân leh cheng nuai 20 thleng chawi theihna a ni.

* Sumdawnna atana hman a nihin kum 5-10 thleng lung-in tàn theih a ni a, cheng nuai 20-100 thleng chawi theihna a ni.