Adhoc M/S zirtirtute'n badge dum an bel; Sorkara sikul dah turin sorkar an phût

Mizoram Government Adhoc Aided Middle School Teachers' Asso­ciation (MGAAMSTA) chu an dinhmunah an lungawi lo a, an dinhmun siamṭha tura sorkar nawr nan nimin aṭang khan badge dum an bel.

MGAAMSTA thuchhuah tarlan danin, Mizoram sorkarin July 15, 2026 khan The Mizoram Education (Provisional Adhoc Grant-in-Aid for General Maintenance of Private School) Rules, 2025 a tichhuak a; chu chuan deficit grants-in-aid school, adhoc grants-in-aid school leh provisional adhoc grants-in-aid school te a huam.

Rules thar chu ngun taka a zir chian hnu ṭha lo an tih thu tarlangin MGAAMSTA chuan, "Zirlaite leh school tan thil ṭha lo tam tak, tun leh hun lo kal zel turah thlen thei tur niin kan hria," an ti.

MGAAMSTA ruahman dan chuan, an lungawi lohna lantir nan nimin aṭanga August 7, 2026 thleng badge dum bel chungin hna an thawk dawn a; August 10-12, 2026 chhungin badge dum bel bakah, No Teaching Day hman an tum a, zirlaite lehkha an zirtir dawn lo.

Badge dum belh leh no teaching day an hman hnu pawha sorkar an ko eih zo lo a nih chuan August 18, 2026-ah an kal zel dan tur ngaihtuaha Aizawla kal khawm an tum a ni.

MGAAMSTA chuan, sorkar hmasain provincialise-a a dah tawhna humhim tur leh, sikul, zirlai leh khawtlangin hamṭhatna an dawn tawh, an hloh leh tak hmu leh ngei turin hmalak dan tur an ruahman tih an sawi a, "Zoram mipui thlawpna leh ṭawiawmna mai bakah, sorkara hotu lu ber berte khawngaihna leh hriatthiamna sang ber kan ngen tak meuh a ni," an ti.

Lungawi lohna an lantir chhunga zirna a bahlah a nih pawh hriatthiam turin MGAAMSTA chuan mipui an ngen bawk.