Tipper neitute leh khalhtute state dang aṭanga balu phurte dang turin an duty

All Mizoram Commercial Tipper Association Owner's and Driver's (AMCTA), Mizoram Tipper Association (MTA) Gen. Hqrs., Aizawl leh MTA Kolasib District te telna MTA Joint Committee chuan state dang aṭanga balu phur lirthei Mizorama lut turte dang turin August 1, Inrinni aṭang khan an duty.

MTA Joint Committee hian an ruahman lâwk angin state dang aṭanga balu phurte chu MTA site office, Phunchawngah leh Kolasib-ah an dang a ni. Balu phurte chu an challan an lo endik zel a, state dang aṭanga balu phur lut dan ngai an awm rih lo. MTA hmalak mekna hi tiam chin awm lo a ni.

Joint Committee hruaitute chuan July 27, 2026-a Aizawl Press Club-a press conference an neih ṭumin, state dang, a bikin Assam-a Bagha balu lak luh kawngah Mizote'n harsatna an tawh nasat thu an sawi a, "Tun hnai khan Bagha balu thiara Mizoram aṭanga kal, balu man an inpek vek hnua Assam Police-te'n dan loa balu phura puhin mi pali an man," tiin, hnam dangte chu an inthurual nia an hriat thu leh sum tam tak chawitir an nih thu an sawi.

Mizoramah intodelhna tham balu a awm nia sawiin Joint Committee hruaitute chuan, "Hnam dangte hian sumdawnnaah Mizote min chîmral mek. Balu hi Mizoram hian kan ngah a, Langkaih balu ṭhate pawh hnam dang pe lo tur leh Mizote chauh phurhtir turin a pump/la chhuaktute kan be tawh. Tuna kan harsatna chu, balu phurh chhuahna tur kawng mumal lo leh chhia a ni," an ti.

MTA Joint Committee hruaitute chuan, Bagha, Bairabi leh Langkaih tlangdung aṭangin Mizoramah Assam balu a lut ṭhin tih sawiin, "Tax invoice chawi loin an rawn sumdawng a, chu chu tlawhchhana hmangin dan hmangin kan dang dawn. State pâwn aṭanga rawn lut hrim hrim hi engtikah mah rawn lut tawh lo tura hmalak kan tum," an ti a; tharum nena hmalak an inhuam thu an sawi. MTA Joint Committee-ah hian member 540 vel an awm a ni.