NexGen-in an din champha an lawm

NexGen Organisation chuan August 1, Inrinni khan BSI Hall, Bible House, Aizawlah an kum 5 tlin champha an lawm a; Vanglaini chanchinbua chawlhkar tin thuziak an tihchhuahte dah khawmna lehkhabu tlangzarh a ni.

NexGen din champha lawmna hi Dr Lalruatsangi'n a kaihruai a, JC Lalnunsanga'n hunserh a hmang. Secretary Dr Mary Lalengkimi'n an pawl din dan leh an hmalakna tlangpui a sawi a, NexGen dintu leh chairperson Dr Lalmalsawmi Hmar-in thuchah a sawi.

NexGen-in Vanglaini chanchinbua chawlhkar tin Ningani apianga thuziak (article) an tihchhuahte dah khawmna lehkhabu pahnihna (Volume-II) chu an pawl patron Dr Lalbiakmawia Ngente-in a tlangzarh a; Praise & Worship hun hman a ni bawk.

Hun hnihnaah NexGen Talk hun hman niin, 'Tunlai khawvel leh Pathian ṭihna' tih thupui sawiho a ni a; tlaiah zanriah kilho a ni.

NexGen hi kum 2021 khan din a ni a, an thil tum chu 'Ram leh hnam hmasawnna tura Pathian ṭih chhuan thar din' tih a ni. Vanglaini chanchinbuah chawlhkar tin Ningani apiangin article an tichhuak ṭhin.