Thla 3 chhungin Champhai dist-ah HIV vei mi 26 hmuh chhuah a ni

Champhai District AIDS Suraksha Mobilization Quarterly Review Meeting chu nimin khan additional DC Lalbiakfela kaihhruaiin an ṭhukhawm. Kumin April-June, thla thum chhungin Champhai district-ah HIV vei mi 26 hmuh chhuah an nih thu tarlan a ni.

Ṭhutkhawma tarlan danin, April-June 2026 chhung khan Champhai district-ah mi 2,587 thisen endik zinga mi 26-in HIV an vei tih hmuh chhuah a ni a, mipa 14 leh hmeichhia 11 niin, anti retroviral therapy (ART) laktir nghal vek an ni. Thla thum chhung vek hian ART la tawh mi 55 zawn chhuah an ni a, an zinga mi 16 chu ART laktir leh niin, mi 55 zinga pathum chu an thi tawh thung.

Viral load test 465 tih niin, chung zinga 438 chu thunun theih a ni a, thunun theih loh 21 a awm a, suppress rate 94.19% a ni. Khaw hrang hrangah VC-te meeting neihpui an ni a, khaw 53-ah Village Level HIV/AIDS Committee din a nih bakah, YMA leh kohhran hrang hrang chanchinbuah HIV awareness thuchah tihchhuah ṭhin a ni.

Thla thum chhung vêk hian Zokhawthar leh Vaikhawtlangah HIV Mass Screening buatsaih a ni a, HIV vei hmuh a ni lo. Champhai district-a homestay leh hotel zawng zawngah condom dah tura hmalak mek a ni bawk.