MIGAHTA-in chawlh an la chhunzawm; Sit-in demonstration nei dawn

Mizoram Govt Adhoc-Aided High School Teachers’ Association (MIGAHTA) chuan an thil phût tihlawhtling tura sorkar nawr nan nimin khan a huhoin chawlh an la chhunzawm a; vawiin hian Vanapa Hall kawtah sit-in demonstration huaihawt an tum.

MIGAHTA hian an thil phût sorkarin a tihhlawhtlin loh vanga lungawi loh lantir nan July 21-22, 2026 khan badge dum an bel a, July 23-24 chhung 'No Teaching Day' an hmang. Sorkar aṭanga thu lawmawm an hmuh loh avangin July 27 khan mass casual leave an la a, nimin khan an la zui leh bawk.

Vawiin hian Vanapa Hall kawtah sit-in demonstration huaihawt an tum a; an thil phût a la hlawhtling lo a nih chuan na zawka hmalak chhunzawm an tum bawk. MIGAHTA-ah hian adhoc high school 90 chuang an awm a ni.

MIGAHTA chuan, provincialise an nih tawhnaa dah lêt phûtin, dinhmun hniam zawka dah duh lohna an lantir tih an tarlang a, "Sorkara kan thil phût a hlawhtlin theih nana lungawi lohna kan lantir avang hian khaw hrang hrang 90 chuanga high school-ah zirna a khaihlak hi pawi kan ti tak zet," an ti.