Vawiina zirlaite hi kan ram siam ṭha turin hmanraw ṭha in ni dawn - HM

Home minister K Sapdanga chuan July 25, Inrinni zan khan LPS Arena-ah Joint Hnampual Meet 2026 a hmanpuinaah thu sawiin, tuna zirlaite chu ram siam ṭha tura hmanraw ṭha an nih dawn thu a sawi.

K Sapdanga chuan zirlaite fuihna thu sawiin, "Vawiina zirlaite hi kan ram siam ṭha tura hmanraw ṭha ber in ni dawn. Vawiinah in zir lai ṭha taka in zir hian nakinah ram hruaitu atana mite ît in la ni dawn a, zirlai nih lai aṭanga kan zirna aia tuipui dang kan neih hian a fuh lo ṭhin," a ti.

Mizoramah remna leh lungrualna a awm theih nan sorkarin a thawk zui zel dawn tih sawiin Sapdanga chuan, "He ram hi ram nuam leh hmasawna siam turin vawiina hnam pual zirlaite ṭang sauh sauh turin ka sawm che u. Kan ṭawng leh kan zia te hrang ṭhin mah se, thisena inzawm unau kan nihna hi vawng nung zel ang u," a ti a, inpumkhatna atan an rilru siam turin a chah.

Home Minister chuan, Joint Hnampual tih chuan rilru a dek zar thei tih sawiin, "Zo hnahthlak hnam hrang hrang lungrual taka ke pên theihna pawl duhawm tak a ding hi a lawmawm. Kan ṭawng ki te, kan ṭawng ri chhuak te dang mah se, huan pakhat chhunga pangpar chi hrang hrang mawi taka a par ang kan ni," a ti.

K Sapdanga chuan eirûkna leh hlemhlêtna chungchang sawiin, "Kan ram rorelna kalsual hi engtin nge kan tireh theih ang, sorkar hna lak kal fuh lo ṭhinte hi eng tin nge kan tih reh theih ang, corruption hluar lutuk anga langte hi engtin nge kan tihreh theih ang tihte ngaihtuahin chhun zan zawmin hun kan hmang," a ti a; tun hmaa tute emaw tih tura an lo ruat chu an kutah a thlen ve tak thu a sawi.

Khualzahawm Robert Romawia Royte, MLA pawhin thu sawiin, "Taima, tumruh leh nasa taka hna thawkte hi mi duham kan ti leh mai ṭhin a, hei hi kan kal pelh a hun tawh. Tum sang, ngaihtuahna changkang nei deuh deuh turin inbuatsaih ila, kan incheina leh kan smart phone te a smart ang bawk hian keimahni hi kan smart ve tur a ni. Hmeichhia aia Mizo mipa ṭawng thei kan ngah mah mah ta hi kan sim a ngai," a ti.