MRHGCD dinhmun chawisan a ni dawn, Fair takin thawktu lak zel a ni ang - HM

Nimin khan Central Training Institute (CTI), Sesawngah 42nd batch Mizoram Home Guards and Civil Defence basic training zote thlah, passing out parade neih a ni a; khuallian Home minister K Sapdanga chuan, Home Guard-te dinhmun chawisan a nih dawn thu sawiin, "Fair takin hna lak zel a ni ang," a ti.

Home Minister chuan, MRHGCD chu dinhmun zahawm leh ṭangkai taka hlan kai a nih dawn thu sawiin, "Home guard volunteer lak dan leh enkawl dan mumal tak awm ṭhin chu ngaih pawimawh a ni ngai lo a, laina leh duhsak zawnga inthun khawmna atan hman a ni ṭhin," a ti a; sorkar hna, a bikin force lam chu dik tak leh thianghlim takin, tlin dan indawta lak zel a nih tur thu a sawi.

MRHGCD lak dan kalphung thar siam a nih thu sawiin K Sapdanga chuan, "Tun aṭang chuan HSLC pass chin chauh dil theihin siam a ni. Physical fitness test-in mark a pu ang a, a tlingte chu uluk takin interview neih a ni ang. Mark hmuh ṭhat dan indawtin, thianghlim takin lak a ni tawh dawn, political fitness-in kawngro a su tawh lo ang," a ti.

Home Minister-in a sawi danin, MRHGCD volunteer post ruak 94 atan diltu 6,000 chuang zingah graduate sang têl an awm. Kum thum atan lak an ni a, an nungchang enin thawh chhunzawmtir a, kum 60 an tlin thlenga pawhsei theih a ni. An bân huna an chhuahpui tur Provisional Employee Saving Scheme duan a ni.

Induhsakna chungchangah seniority en vak a ni dawn lo a, thuawih, taima, hotute zah thiam, mahni duty ṭha taka thawk, ruih theih thil laka fihlimte'n duhsakna an dawng hmasa dawn.

MRHGCD Passing Out Parade-ah hian Lt Col. Clement Lalhmingthanga, MLA chu khualzahawm a ni a, MLA Jeje Lalpekhlua pawhin a hmanpui. Training chhuakte hi mi 40 an ni a, mipa 37 leh hmeichhia pathum an ni.