Mau/rua leh hruihnâng te ṭangkai ṭaka kan hman a ṭul - Minister F Rodingliana

Commerce & Industries minister F Rodingliana chuan nimin khan a pisaah Bamboo Handicraft Cluster-te hnenah mau leh thing sawngbawlna tur khawl Bamboo Development Agency (BDA)-in a ruahman 80 a sem a; mau/rua leh hruihnâng te ṭangkai taka hman zel a ṭul thu a sawi.

F Rodingliana chuan, "Kan rama leilung hausakna mau/rua leh hruihnang te ṭangkai taka kan hman zel a ṭul. Mizoramin hma a sawn zelna tur te, ṭhalaite chawikanna atan leh hna tam zawk siam theihna turin industry/cluster din zel a pawimawh," a ti.

Commerce & Industries Minister chuan, BDA-in industry pawimawhna hriain cluster siamin, mimal industry dinte a theih ang angin a puih mek thu a sawi a; a bik takin paper mill din leh bamboo pulp hman ṭangkai kawnga ngaihtuahna seng tam turin cluster hrang hranga beneficiary-te a chah.

Khawl semte hi National Bamboo Mission leh Micro, Small Enterprises - Cluster Development Programme (MSE-CDP) aṭanga BDA kaltlanga hmuh a ni a, khawl chi hrang hrang 80 a ni. Edenthar Bamboo Handicraft Cluster, Sesawng Bamboo Handicraft Cluster, Tuma Ecoguard Solution leh Wood Carpentry Cluster, Baktawng te hnenah sem a ni a, a vaiin Rs 2,67,44,174 man a ni.

Khawl semnaa tarlan danin, BDA hi kum 2002 khan din a ni a, Mizorama maute hman ṭangkai leh sawngbawlna turin hma an la ṭhin. Tun hnaiah handicraft cluster leh entrepreneur-te thlun zawm zel turin nasa takin hma a la a ni.

Entrepreneur leh industry din bul ṭante tan BDA workshed leh hmunhmate hman hawhtirin, Bamboo Technology Park, Sairangah agarbatti stick leh briquette charcoal siam leh thawn chhuah kawngah hma an la a; Central Jail-a táng mekte tan vocational training an buatsaihin, raw batti/thosi hlo siam an zirtir a, chungte chu tualchhung ah hralh chhuah mek.

BDA hmalakna kal mek zingah Bamboo Technological Park, Sairang tihchangtlun te, National Bamboo Mission aṭangin EIBTC Building, Zuangtuia incubation centre siam te, MSE-CDP hnuaiah EPIP, Lengte a saw mill waste aṭanga fuel pellet siamna project buatsaihte leh mau aṭanga fibre lak chhuah dan zir chiante a tel a, hemi atan hian DPR siam mek a ni.