Congress party-in Black Day an hmang; Kristiante thlavâng hauh turin CM an phût

Mizoram Pradesh Congress Committee (MPCC) chuan nimin khan Vanapa Hall kawtah Parliament session-a Foreign Contribution (Regulation) Act Amendment Bill, 2026 pawm tum duh loh lantir nan 'Black Day' an hmang a; India rama Kristiante thlavâng hauha pên chhuak turin Mizoram Chief Minister an phût.

Black Day-a thusawitu MPCC senior vice president Lalnunmawia Chuaungo chuan, FCRA Amendment Bill, 2026 a tlang loh nan dodal zel an tum thu a sawi a, "Kan CM pawh hemi chungchangah hian kohhran, NGO hrang hrang leh political party tin hruaitute hruaiin Prime Minister min zuk hmuhpui rawh se," a ti.

Lalnunmawia Chuau-ngo chuan, Mizoramin MP-ah vai ṭawng leh sap ṭawng thiam an zawrh angin MP atan thlan a nih thu sawiin, "Ani hian Lok Sabha-ah he Bill discuss a nih hunah a ep zawngin thu sawi ve ngei rawh se," a ti a; Chief Minister chu special assembly koa, FCRA duh lohna official resolution siam ngei tura an phût thu a sawi.

FCRA Amendment Bill pawm a nih pawhin an ngawi reng dawn lo tih sawiin Lalnunmawia chuan, "Kan dawh mai mai dawn lo a, kan do zel dawn. Mizorama kohhran hrang hrangte leh NGO te, hnuchham leh chanhaite tana thawktu zawng zawngte chungah lawm-thu ka sawi a, he Bill do zel tur hian ṭanrualpuiah ka sawm a ni," a ti.

Lalnunmawia Chuaungo chuan, FCRA Amendment Bill 2026-ah hian a ṭhen chauh tihdanglam a nih thu sawiin, "Foreign contribution dawng turin certificate a ngai a, tuna dan tharah chuan certificate an hnâwl. An hnâwl chhan sawifiah a ni lo a, tu emawin FCRA dil mah se, dan tharah chuan hnâwl tawp theih a ni a, appeal-na tur a awm tawh dawn lo," a ti a; Mizorama kohhrante charity atana inhmang, hnuchham enkawlna te, rualbanlote tana inhmangte'n harsatna an tawh thu a sawi.

MPCC Senior Vice President sawi danin, FCRA portal-ah July 15, 2026 thleng khan ram dang ṭanpuina (foreign contribution) dawng thei 14,449 an awm. Portal aṭangin 22,498 tihtawp (cancel) an ni tawh a, 15,212 dang chu an certificate dam chhung a pêl tawha ngaih a ni.
All India Congress Committee ṭanga Mizoram viltu Dr Chella Kumar chuan, BJP sorkarin FCRA pawm a tum meka an bitum ber chu NGO te, hnam leh sakhaw tênaute an nih thu a sawi a, "FCRA hi an ti khirh em em a, he dan hnuaiah hian FCRA hmanga din biak-in te, damdawi-in leh zirna-in te thlengin chhuhsak theih a ni dawn," a ti a; BJP innghahna Rashtriya Swayamsevak Sangh (RSS) erawh chu FCRA-in a nghawng ve thei dawn lo niin a sawi.

Black Day hmanna inkhawm hi MPCC treasurer Dr Lalmalsawma Nghaka'n a kaihruai a; MPCC president hlui leh Chief Minister hlui Lal Thanhawla thuchah ngaihthlak a ni a, Aizawl District Congress Commit-tee president Lalroenga kaihhruaiin resolution paruk pawm a ni.