AR hmun hluia Vanapa Hall leh park siamna atana intihsiakna zawh a ni
Urban Development & Poverty Alleviation department-in Assam Rifles chhuahsan hmuna Vanapa Hall sak dan tur leh park siam dan tura intihsiakna, Architectural Design Competition a buatsaih chu nimin khan a hmáwr bàwk a ni a, chief minister Lalduhoma leh UDPA minister K Sapdanga ten an hmanpui. Inelnaah hian Catalyst Architecture Studio pakhatna a ni.
Vanapa Hall & Park Architectural Design Competition hi March 17, 2026 khan ṭan a ni a, firm 33 telin, firm 16-in an design an thehlut a, chu'ng zinga 14 chu pawm a ni. A ti ṭha zual firm paruk thlan chhuahte'n an design chu endiktute hmaah an sawifiah an leh a, Catalyst Architecture Studio chu pakhatna a ni ta a ni.
Chief Minister chuan, Vanapa Hall leh park chu puipunna hmun langsar ber tur a nih avangin mawi, ṭha leh him ni se an duh thu a sawi a, "Miin Aizawl an mitthlà ruala an mitthláa lang ve nghal tur centre mawi tak sak kan duh. Hall leh park mawi sak dan tur chu Architectural Design Competition buatsaih hmanga thlan ṭhain kan hria a, UDPA department-in an bawhzui a, vawiinah a hmáwr kan bâwk ta a ni," a ti.
Aizawl chu a tirah sap hoten an thiam angin an ruahman tih sawiin Lalduhoma chuan, "Ziaka inhnutchhiah a awm lo a, zalenna kan hmuh hnuah a tlachawp zela ngaihtuah chungin kan luah chho a ni. A hun laia kawngpui zau tâwk tak nia kan ngaih kha tunah chuan a lo zau tâwk ta lo a, hall lian tham tak nia kan ngaih kha an lo tê ta a, kawngpui zau zawk, puipunna hmun ṭha zawk, park nuam takte kan mamawhna a lo sang ta," a ti a; Advisory Committee ruahman angin AR chhuahsan ram chu hman ṭangkai a nih dawn thu a sawi.
UDPA minister K Sapdanga pawhin thu sawiin, "Aizawl hmél thar, changkang tak, mipuite'n an hman ṭangkai tur, mite'n an tlawh châk em em tur sorkarin a duang mek," a ti a; ruahmannate chu a taka chantir thuai an tum thu a sawi a ni.
Lawmman semna inkhawm hi IPR Lianchhiari Rûnah buatsaih a ni a; UDPA secretary V Lalsangliana'n a kaihruai a, PWD chief architect Lalengzuali'n an endik dan tlangpui a sawi.
UDPA department hian Vanapa Hall & Park Architectural Design Exhibition an buatsaih nghal a, July 22, 2026 thleng IPR Conference Hall-ah mipui tlawh theiha hawn a ni ang.