Adhoc H/S-te'n lungawi lohna lantir dawn; An tlin lohna hrethiam turin sorkar an ngen
Mizoram Govt. Adhoc Aided High School Teacher Association (MIGAHTA) chuan an sikulte sorkara dah (provincialise) tura sorkar kar nan vawiin aṭanga July 31, 2026 thleng lungawi lohna an lantir dawn a; an tlin lohna lai hrethiam tur leh an tlinna lai hriatsaka provincialise turin sorkar an ngen.
MIGAHTA chuan thuchhuah siamin, Mizorama adhoc high school-te provincialise tura sorkar an ngennain awmzia a neih loh thu an tarlang a, "Tun hnaiah sorkarin sikul eng emaw zat a provincialise zinga notification a tihchhuah tharah ‘Power to relax’ hmanga a dâwm kante (provincialise) an awm. Criteria hrang hranga an tlin lohna lai hrethiamin, an tlinna hmanga provincialise an ni. Keini ho pawh kan tlin lohna lai hrethiam tur leh, kan tlinna lai min hriatsak a, min provincialise ve ngei turin sorkar kan ngen a ni," an ti.
Adhoc H/S-te lumpsum grant-in-aid-a sorkarin dah let leh a tum chu an duh loh thu leh dodal zel an tum thu sawiin MIGAHTA chuan, "Kan hmalakna hi ṭhangthar sorkar hna zawng mekte tan a pawimawh dawn tih min hriatpui turin Mizo mipui kan ngen," an ti. Mizorama adhoc H/S 80 chuangah chi li-in lungawi lohna lantir an tum thu sawiin, lungawi lohna an lantirin a nghawng mipui leh sorkar hotute hriatthiamna an ngen a ni.
MIGAHTA chuan, lungawi lohna an lantir chung pawha sorkar aṭanga chhanna ṭha an hmuh loh chuan na zawka hmalak zel an tum thu an tarlang a,"Adhoc H/S-te hi kum 30 kal ta aṭanga khawtlang mipuite'n harsatna tam tak karah leh sorkara luh beiseia thâ thlah loa an lo enkawl tawhte an ni," an ti a; kum 2023-a sorkarin provincialise tura a lo tih tawh chu kaltlangpui turin sorkar an ngen.
An hmalakna turte chu thlâwp turin MIGAHTA chuan mipui an ngen a; sorkar sikul nei ve thei tawh lo tura sorkar hmalakna chu dodalpui turin an sáwm bawk.
LUNGAWI LOHNA LANTIR DAN TUR
July 21 & 22: Badge dum bel
July 23 & 24: Hna thawh loh (zirtir loh)
July 27 & 28: A huhoa chawlh lak
July 29 - 31: Aizawlah lungawi lohna lantir (peaceful sit-in demonstration)