Aizawla Traffic Police Special Drive-ah lirthei dan bawhchhia 870 man tawh

Aizawl Traffic Police chuan July 19, Pathianni chawhnu khan Aizawla hmun hrang hrangah Special Drive neiin, lirthei dan bawhchhiate an vâi leh a, dan bawhchhia mi 220 an man. Traffic police-te hian kumin 2026 chhungin Aizawlah Special Drive ṭum nga an nei tawh a, chungah chuan dan bawhchhia 870 an man tawh.

Traffic Police Media Cell tarlan danin, July 19, 2026-a lirthei dan bawhchhia an mante chu - two wheeler-a helmet khum lo mi 131, driving license nei loa khalh mi 27, bike ri ring 10, kumtlinglo lirthei khalh mi paruk, rûi chunga khalh mi pali, two wheeler-a mi pahnih aia tam inphur mi 19 leh MV Act dang bawhchhia mi 23 an ni.

Aizawl Traffic Police hotute hnen aṭanga thu dawn danin, kumin 2026 chhungin Special Drive vawi nga an nei tawh a, chungte chu March 22, May 23, June 14, June 25 leh July 19-ah te a ni a; lirthei an man tawh zawng zawng chu 870 a ni.

Aizawl Traffic Police Media Cell chuan, Special Drive chu dan bawhchhiatna vanga lirthei chetsualna thleng ṭhin titlem tur leh mipui him zawkna tura buatsaih a niih thu an tarlang a, "Aizawl khawpui a lo him a, thlamuang taka kan kawngpuite mi tinin kan hman tlân theih nan Special Drive hi a ṭul anga kalpui zel a ni ang," an ti.

Lirthei khalhtute zingah inthlahdah vang leh mi dang tana harsatna thlen hreh miah lo, dan bawhchhia man tur an la awm zel chu pawi an tih thu Traffic Police chuan an tarlang a; lirthei neitu/khalhtute chu ṭan la thar zel turin an chah a ni.