Iron rod bûk tling lo tihtawp dan tur rêl

Food, Civil Supplies & Consumer Affairs (FCSCA) minister B Lalchhanzova hoin nimin khan a pisaah Mizorama iron rod a nih dan tur ni pha lo zawrh thin tihtawp dan tur rel a ni.

Ṭhutkhawmah hian FCSCA depatment, Legal Metrology leh PWD Quality Control Division hotu te, Mizoram Civil Engineers’ Association, Mizoram Consumers’ Union leh All Mizoram Cements & Iron Rod Dealers’ Association-te an tel a; iron rod a nih tur ang ni pha lo Mizorama a luh ṭan dan leh do dan turte an sawiho.

Hmalak dan tur kawng hrang hrang awm theite sawi a ni a, mipui him nan chak zawka hmalak an rel a; Iron rod zuartute hnenah size dik chauh Mizorama la lut tura hriattirna leh vaukhanna ziaka pek ni se, an ti. BIS nena thawhhona tihchak ni se, Mizorama rod size dik lo zuarte leh chutiang ti tura hma latute zawng chhuak turin chak taka hmalak ni se, tiin an rel.

Hriattirna chhuah hnu pawha ti lui iron rod zuar leh company te chungah hremna lek ngei ni an ti a; mipui pawhin iron rod man tlawm ringawt ûm loin, size dik lei nachang hria se, tiin hmalakna tur ruahmanna an siam bawk.

B Lalchhanzova chuan, Mizoram hmun tam takah danin a bituk aia têa iron rod hralh a awm nia thu dawn bawhzuiin sawihona buatsaih a nih thu a sawi a, "Lirnghing nat theihnaa awm kan nih avangin in sak nana rod kan hmante chu a len zawng, a rih zawng leh a chak lamah te mi thiamte'n a nih tur ang an duan a tling pha ngei tur a ni. Rod len zawng tur tling lo hman hian in chakna nasa takin a tihniam a, a him lo tak zet a ni," a ti.

Ṭhutkhawmah hian PWD leh Mizoram Civil Engineers’ Association aiawhte'n iron rod a nih tur ang tling lo hman a hlauhawm dan an sawifiah a; chungte chu mipuiah a tam thei ang ber puanzar a, mipuite chu iron rod leiah fimkhur se a duh thu FCSCA Minister chuan a sawi.