MizoTaxi-ah dilna 1,030 a lut tawh; Dilna 863 pawmin, 113 hnâwl a ni

MizoTaxi application hmang duhte tan sorkarin inziah luh hun a hawn belh mek a; nimin thleng khan Aizawla mihring phur sumdawnna lirthei chi thum aṭangin lirthei 1,030-in app-a inziah luh dilna an thehlut tawh a, 863 pawm tawh niin, dilna 113 hnâwl a ni.

Vanglaini palai zawhna chhangin Transport department hotute chuan, MizoTaxi app-a inziah luh hun hawn a nih aṭangin nimin thleng khan four wheeler taxi, two wheeler taxi leh auto-rickshaw service mekte zinga 1,030-in app-a inziah luh dilna an thehluh tawh thu an sawi a, "Inziah luh dilna thehlut zinga 863 chu an document-te enfiah a nih hnuah pawm an ni tawh," an ti.

MizoTaxi-a lirthei inziak lut turte hian lirthei document felfai, driving licence leh voter identity card an neih a ngai a; inziah luh dilna lut 1,030 zinga 113 chu document fel kim loh vangin hnawl a nih thu Transport department hotute chuan an sawi. Document endik tawh, pawm mai theih tura tihfel 40 a awm mek thu an sawi bawk.

Transport department hotute sawi danin, nimin thlenga dilna pawm tawhte chu - four wheeler taxi 235, two wheeler taxi 613 leh auto-rickshaw 15 a ni a; dilna hnawl 113-te chu four wheeler taxi 40, two wheeler taxi 71 leh auto-rickshaw pahnih a ni.