Khawthlangtuipui lian avangin chhungkaw 89 insawn chhuak tawh

Tun hnaia ruahsûr nasa vangin Khawthlangtuipui a lian a, Tlabung leh a chhehvel hmun eng emaw zat a chîm. Tuilian leh leimin vangin hriat theih chinah chhungkaw 89-in an chenna in an chhuahsan tawh.

Tlabung aṭanga thu dawn danin, Khawthlangtuipui lian avang hian Tlabung bikah chhungkaw 42 an insawn chhuak a; Tippereghat khuaah chhungkaw 40 vel leh Nunsury-ah chhungkaw pasarih an insawn chhuak tawh bawk. Insawn chhuak tawh zat hriat theih chin chu chhungkaw 89 an ni a, inbiakpawhna ṭhat loh vanga dinhmun hriat chian theih loh a awm.

Hetihlai hian, Tlabung Chawnpui Venga chhungkaw 12 leh Chandmary Venga chhungkaw pahnih chu lei khì leh min vangin hmun him lamah an insaseng tawh. Ruahsur vanga chhiatna hrang hrang tuarte hi Tlabung SDO (Civil) Moses Lalfakawma Tlau kaihhruaina hnuaiah a theih ang anga chhawmdawl zel an ni.

West Tuipui bialtu MLA Prova Chakma chuan tuilian tuartute hnenah nimin khan buhfai a sem a, Tlabung Branch YMA hnenah Rs 3,000 a hlan bawk. Prova Chakma hi Delhi-ah a chám mek a, fûr khawcheng leh tuilian vanga a bial mipui tam takin chhiatna leh harsatna an tawk chu pawi a tih thu leh hrehawm a tih thu a sawi.

Tlabung Branch YMA hruaitute chuan, fûr laia tuilian tuarte ṭhinte chuan hmun sang zawk lamah insawn duh mah se, inbenbelhna tur hmun dang remchang an neih loh thu leh, insawn chhuahna tur sorkarin a ruahmansak loh chuan an tan thil harsa a nih thu an sawi.