Data-te him taka enkawl a ṭul - Dr Vanlalthlana

Information & Communication Technology (ICT) chuan nimin khan Aijal Club-ah 'Workshop on Strengthening Cyber Security Frameworks for State Data’ an buatsaih a, ICT minister Dr Vanlal-thlana'n a hmanpui.

Dr Vanlalthlana chuan, mipui himna tura an mimal thil (privacy) vawn himsak a, an hamṭhatna tur ngaihtuah leh rinngam nih chu sorkar tih tur a nih thu a sawi a, "Sorkarin mipui digital data tam tak a kawl a, mimal identity leh land record te sorkarin a vawng mek. Digitization hi sorkar hmanraw ṭangkai a nih rualin, fimkhur ngaihna tam tak a awm a, mipuite'n digital governance-ah rinna an nghah theih nan an data-te him taka enkawl a ṭul," a ti.

Data enkawlnaah digital entry point-te khauh taka vawn a ṭul thu sawiin Minister chuan, "Sensitive data-te mi dangin an hmuh theih lohna tura khuahkhirh (encrypt) vek a nih theih nan tunlai thiamna kan hman a ngai," a ti a; cyber security chu phurrit anga ngai lo a, rorelna ṭha leh langtlang kalpui theihna lungphûm anga en turin a sorkar hotute a chah.

Zirhonaah hian Mizoram sorkara department hrang hrang aiawhte an tel a, thupui paruk zirho niin, sawihona leh zawhna leh chhanna hun hman a ni. ICT secretary Dr YLN Reddy leh chief infomatic officer James Lalnunmawia te pawhin thu an sawi.