ADC-ah sorkar ngêlnghet a din a ṭul - Minister Sawivunga

District Council & Minority Affairs minister C Lalsawivunga chuan, Mizorama autonomous district council (ADC)-ah sorkar ngêlnghet din a ṭul thu leh, thawktu lak chungchanga an chìn dan ṭha lote bànsan ngam a ṭul thu a sawi.

DCMA Minister hian nimina CADC chief executive member atana Nirupam Chakma lak luhna inkhawmah thu sawiin, CADC chu kum khat chhung Governor’s Rule-a a awm hnua mahnia ro inrêl tura sorkar a ding leh ta chu CADC mipui a lawmpui thu a sawi a ni.

Mizorama ADC pathum­ah sorkar ngêl­nghet a awm theih loh fo thu sawiin Minister chuan, "Zêp thu a chêng lo, kan inthlak deuh zut reng a, he thil hi ngaihtuahna fím leh thiang tak sênga kan tihtawp a ṭul. Kan kal dan pangngaia kan kal reng chuan he ram leh Council hian hma a sawn ngai dawn lo. Tun sorkarah chuan rilru thar puin, sorkar ṭha, ngêlnghet leh tlo siam turin insangmar ila, rinawm takin i awm ang u," a ti a; kal tawhte aia ṭha leh rintlak zawk sorkar siam tura an beisei thu a sawi.

C Lalsawivunga chuan, state sorkarin ADC-te hmasawnna tur a ngaihtuah thu sawiin, "District council-te'n tih tur leh mawhphurhna kan nei tih i hria ang u. Hna lak chungchangah kan chìn dan ṭha lote kan bànsan ngam a ngai. Budget-a pawisa awm dan ngaihtuah miah loa politics khelhna angrenga thawktu lak vak te, election campaign-na atana hna tawktarhte hi thleng tawh lo se, kan mamawh ngei chauh dik leh fel taka lak a hun tawh," a ti.

DCMA Minister chuan, CADC sorkar a pian theihna tura hma latu leh thutlukna siamtu Governor leh Chief Minister te chungah a lawm thu a sawi a; CADC budget chu kumin 2026-27 ah chuan cheng nuai 16,939.80 a tlin tawh thu a sawi bawk.