RD Minister-in VB-GRAMG a hawng

Thingtlang mite kum khata ni 125 an inhlawhna tura sorkar laipuiin a ruahman, Viksit Bharat-Guarantee for Rozgar and Ajeevika Mission (Gramin) [VB-GRAMG] chu Mizorama kalpui turin nimin khan nodal department - Rural Development & Administration (RDA) minister Prof. Lalnilawma'n Vanapa Hall-ah a hawng.

RDA Minister chuan, ni 100 inhlawhna (MGNREGS) thlakna tur VB-GRAMG chu a ṭha taka kalpui a nih theih nan Mizoram sorkarin theihtawp a chhuah nghal thu sawiin, "India ramah Mizoram hi scheme notification chhuah hmasa ber kan ni," a ti a; VB-GRAMG-a state sorkarin a tum ve tur cheng vbc 128 chu Chief Minister leh Finance department ten an ngaih pawimawh avangin sumah harsatna a awm dawn a sawi rualin, a hlawhtlinna tak tak chu mipui, VC, official te thawhhonaah a innghah thu a sawi.

India-in zalenna a neih kum 100 a tlin hun, kum 2047-ah India chu ram hmasawn (developed country) nihtir tum a nih thu sawiin Minister chuan, "MGNREGA-ah chuan ni 100 inhlawhna leh community asset din ngaih pawimawh a ni. VB-GRAMG-in a tum ber pakhat chu khawtlang tihhmasawn a ni a, khawtlang leh mimalah ṭheuh hmasawnna a thlen chuan Viksit Bharat kan thleng thei ang," a ti.

Prof. Lalnilawma chuan, VB-GRAMG-in tui hnianghnar taka neih a ngaih pawimawh thu sawiin, "PHE department nen ṭangkawpin tuikhuah rintlak tak siam tum a ni a, India leh Israel sorkar ṭangkawpin Mizoramah tui hnianghnar taka a awm zel theih nan hmalakna kalpui mek a ni," a ti a; ni 125 inhlawhna chu mipui eizawnna nen a inkungkaih tlat thu leh, department dangte nen ṭangkawpin eizawnna changtlung zawk duang turin hmalak mek a nih thu a sawi.

RDA secretary R Zarzosanga chuan, VB-GRAMG hnuaiah ni 125 inhlawhna siam a nih tur thu te, kum khat chhungin ni 60 farming season-ah chawlh siam a nih tur thu a sawi a, "Scheme thar hi thingtlang lama eizawnna siamtu pawimawh tak a ni zel dawn," a ti.

RDA additional secretary V Lalengmawia tarlan danin, MGNREGA khan India ramah kum 20 chuang kalpui a ni a, Mizoramah ṭha taka kalpui a nih avang leh mipuiin an thawh ṭhat avangin, kum 2011-a poverty level 23% chu kum 2026-ah chuan 11%-ah a tlahniam. VB-GRAMG atan hian sorkar laipui aṭangin cheng vbc 611.65 leh Mizoram sorkar aṭangin cheng vbc 67.95 dah tawh a ni.