Laldenga thlânah zahna pangpar dah

Nimin July 7 kha MNF dintu leh chief minister hlui Laldenga thih champha a ni a; zing karah a thlânah MNF-te'n zahna pangpar an dah a, sûnna leh hriatrengna hun an hmang.

Laldenga thlân, Treasury Square-a inkhawm buatsaihah MNF president Zoramthanga chuan, "Inremna hlawhtling ber leh ram zalen ber min hlawh chhuahpuitu, hnam hmangaihna chi Zo fate thinlunga tuhtu Pu Laldenga hi hriatreng a phû a, a thih cham a lo thlen hian zahna chibai kan bûk nawn leh a ni," a ti.

MNF President chuan, Laldenga hoa remna hlawhtling tak an neih chu hnam dangte'n an awt nia sawiin, "Vannei min ti hle. Hetianga inremna ṭha kan nei thei hi ropui min tihpui a, sawi nuam an ti hle a ni," a ti a, remna vawn him zel chu ṭhangtharte mawhphurhna leh tih tur a nih thu a sawi.

Chhungkaw aiawha thusawitu Dr Reenee Lalrinzuali d/o Laldenga, MNF general secretary chuan, "Pathian ringtute tan Pathian leh ram tana ke pên chu a inhmeh thu a sawi a, "MNF-in kan thupuia 'Pathian leh kan ram tan' kan tih hi kan zavaia kan thupui ni se a ṭha hle ang," a ti.

Inkhawm hi MNF treasurer Lalruatkima'n a kaihruai a, mi hrang hrangin Laldenga thlânah zahna pangpar an dah a ni.

Laldenga hi July 11, 1927-ah Lunglei Pûkpuiah a lo piang a, kum 1944-ah British Indian Army a zawm. Kum 1959-ah Mizo National Famine Front a din a, October 22, 1961-ah Mizo National Front tia thlak a ni. June 30, 1986-a inremna thuthlung ziah a nih hnuah Mizoram state sorkar lailawkah chief minister a ni a, kum 1987 inthlanpuiah chakin, chief minister a ni zui.

Cancer vangin Memorial Sloan Kettering Cancer Centre, USA-ah enkawl a ni a, Mizoram pana an haw kawngah Ashford Hospital, London-ah July 7, 1990 khan India huna tlai dar 2:30-ah a thi. July 13, 1990-ah Tuikhuahtlanga an inah vui a ni a, tun thlengin Mizo zinga state funeral-a vui awm chhun a ni.