Lunglei YMA-in CM leh Minister kâwm

Lunglei Sub-Headquarters YMA hruaitute chuan nimin khan chief minister Lalduhoma leh Sports & Youth Services minister Lalnghinglova Hmar te an pisaah ve ve an kâwm a; Lunglei district hmasawnna tura an mamawhte an thlen.

Lunglei YMA hruaitute hian Chief Minister hnenah chhim lama rêl kawng kal turah Lunglei khawpui hnaiha rêl chawlhhmun siam tura ngenna an thlen. Lunglei leh chhim lam tana economy hmasawnna tur bakah, kut hnathawka eizawngte tan thlai thar thawn chhuahna, bungraw lak luhna awlsam bakah, tourism industry-in chhim lam a kal kân loh nan te, ram chhung hmun dangte nena inpawhna ṭha awmna tura ṭul leh pawimawh a nih thu sawi a ni.

Kawrpuichhuah Integrated Check Post (ICP) hmalakna tharthawh tura Home Ministry nawr turin CM hi an ngen a; Lunglei chhuah lama khawpui tâwt mek tihziaawmna tur te, khawpui zauhna tur leh thil danga ṭangkai tur Lunglei East By-Pass Road tihpuitlin thuai a nih theih nan State Priority Project-a dah a, DPR siama hma laksak turin an ngen bawk.

Chief Minister chuan, rêl kawng kal tur chu Lunglei bakah khawpui pawimawhte hnaih thei ang bera kaltir tum a nih thu a sawi a; Kawrpuichhuah ICP chungchang chu India leh Bangladesh sorkar indawrna kal mek a nih thu leh, a hlawhtlin theih nan a theih ang angin hmalak an tum thu a sawi.

CM hian Sub-Hqrs YMA ram Pukpuia Youth Development Centre cum Multipurpose Conference Hall sakna tur DPR leh, Lunglei Sub-Hqrs YMA leh Lunglei Municipal Council ten YMA pandal structure thlakna tur gavanised pandal structure DPR an siam chu tihhlawhtlin ngei an tum thu a sawi. Lunglei AOC leh 3-Gate inkar kawng thawm ṭhat hna ṭan thuai a nih tur thu a sawi bawk.

Chief Minister an hmuhnaah hian Sub-Hqrs YMA Lunglei hruaitute hi Lunglei West bialtu MLA T Lalhlimpuia a ṭawiawm a ni.

Lunglei YMA hruaitute hian Sports minister Lalnghinglova Hmar a pisaa an hmuhnaah, hun rei tak chawlhsan tawh State Sports Academy, Zobawk chu tipuitling tura hmalak thuai ni se an duh thu an thlen a ni.