Chaltlang Tourist Lodge-ah 4-star hotel aia hniam lo din turin inremna ziah a ni

Tourist Lodge, Chaltlangah 4-star aia hniam lo hotel din turin Tourism department leh Hotel Polo Towers Ltd., Shillong, Meghalaya te chuan nimin khan inremna, Conce­ssion Agreement an ziak.

Inremna ziah hi 'Develop­ment of 4-Star or Higher Category Hotel at Tourist Lodge, Chaltlang, Aizawl, Mizoram on Design, Build, Finance, Maintain, Operate, Manage & Transfer (DBFMOMT) Basis' hnuaiah a ni a; Tourism department aiawhin secretary leh director Vanlaldina Fanai leh Hotel Polo Towers aiawhin chief financial officer & director Prashant Gupta ten CMO-ah hming an ziak a ni.

Sorkar thuchhuah tarlan danin, Tourist Lodge, Chaltlangah 4-star aia hniam lo hotel din tura hmalakna hi DoNER leh Planning & Programme Implementation department bul ṭan a ni a; February 19, 2024 khan Mizoram sorkar chuan Kolkata-ah Road Show neiin, hotel changtlung zawka siam a nih theih nan PPP mode-a kalpuina tur ruahmanna a siam tawh a ni.

Aizawlah 4-star chin chung lam hotel a la awm loh avang leh, Mizoram hi India rama state zingah hotel ṭha la nei lo awm chhun nia hriat a nih avangin Mizoram sorkar chuan Chaltlang Tourist Lodge tichangtlung tuin hma a la tih awiin sorkar thuchhuah chuan, "Hotel Polo Towers nen inremna siam ni mah se, a hmunhma hi sorkar ta a ni reng dawn," a ti.

Sorkar thuchhuah chuan, project hmang hian Aizawlah khualbuk ṭha leh changkang zawk, khualzinte tana hmun ṭha tak siam a ni dawn a, tualchhung mi tam tak tan eizawnna leh revenue tam zawk a siam dawn thu a tarlang bawk.

CHALTLANG TOURIST LODGE TIHCHANGTLUNNA

☑ Chaltlang Tourist Lodge tihchangtlunna turin Mizoram Public Procurement Rules, 2020 tlawhchhanin Vanglaini leh The Times of India chanchinbuahte advertisement tihchhuah a ni a, May 16, 2025-ah State Procurement Portal-ah e-tender chhuah a ni.

☑ Tender chhangtu Hotel Polo Towers Ltd chiah an awm. Endiknaah an tling tâwk tih hmuh a nih avangin inremna ziahpui a ni.

☑ Inremna ang chuan, Hotel Polo Towers-in kum 30 chhung atan DBFMOMT basis-in hna an thawk ang a, kum 10 dang ṭum hnih pawhsei theih a ni ang.

☑ Hotel-ah pindan 60 (pindan 40 danga tihlen belh theih) tal awm tura tih a ni.

☑ Englai pawha inhawng (24X7) multi-cuisine coffee shop, specialty restaurant, lounge leh executive health club a awm tur a ni a; 5-dtar hotel-a hlan kai theih tura kalpui tur a ni.

☑ Inremna ziah aṭanga ni 45 chhungin a hmunhma hi Hotel Polo Towers hnenah hlan a ni dawn.

☑ Hotel Polo Towers hi India hmarchhaka hotel company lian ber a ni a, hotel pakua an enkawl mek bakah, hmalak mekna hotel dang pasarih an nei a, chung zingah chuan Meghalaya, Tripura, Nagaland leh Indian Railways te nena PPP mode-a kalpuite pawh a tel.