SIR-a inziah luh zawh thawkhat a ni; Ziah luh theih loh mi 46,448 an awm

Electoral Roll endik rûnpui, Special Intensive Revision (SIR) 2026 neih mekah enumeration form-te Election Commission of India (ECI) NET-ah thun luh kim a ni tawh a, SIR neih mekna state 16 zinga zo hmasakna ber a ni. Hetihlai hian, Mizoram electoral roll hman meka chuang zingah enumeration form-a ziah luh theih loh mi 46,448 an awm.

Directorate of Election, Mizoram tarlan danin, electoral roll hman mekah Mizoramah voter 8,75,068 an awm a, mipa 4,23,397 leh hmeichhia 4,51,671 an ni. Voter 8,75,068 zinga 8,75,057 chu June 25, 2026 thleng khan ECINET-ah thun luh (digitise) tawh anga chhinchhiah a ni a, thun luh loh 11 an la awm. Thun luh tawh zat percentage chu 99.9987... a ni a, 100% angah ngaih a ni.

Hetih lai hian, June 25, 2026 thleng khan enumeration form-a ziah luh theih loh mi 46,448 an awm a, voter zat aṭangin 5.31% a ni. Ziah luh theih lohte chu - thi tawh te, hmun danga pêm tawh te, electoral roll-a awm nawn te, an awmna chin hriat lohte leh chhan dangte a ni.

Chhan hrang hrang vanga SIR enumeration form-a voter ziah luh loh hi Aizawl district-ah tam berin, mi 20,504 an ni a, percentage-ah pawh sang berin 7.01 a ni. Voter ziah luh loh tlemna ber district chu Khawzawl niin, mi 436 (2.42%) an ni a; ziah luh loh percentage hniam ber Serchhip district-ah 2.18% a ni thung.

Enumeration form-a ziah luh theih loh mi 46,448 awm mah se, ECINET-ah thun luh anga chhinchhiah phawt tho an nih thu SIR buaipuitute chuan sawiin, "Enumeration form thehluh hun a la tawp loh avangin a la danglam thei," an ti a; sakhuana vanga inziak lut duh lo an awm thu an sawi bawk.

Mizoram Directorate of Election chuan, SIR enumeration form-a ziah luh loh zat an tarlan chungchangah, "Stakeholder-te'n awlsam taka field level verification leh claim (chanvo hauhna), objection (hnial theih) leh rawtna (input) an neih theih nan a ni. He thil hian a tum chu stakeholder-te nena electoral roll dik, huapzo leh rintlak buatsaih a ni," an ti. A hun takah SIR zawh a nih theih nan thawhpuiah political party-te leh Mizoram mipui an sáwm a ni.

SIR 2026-ah hian June 28, 2026 thleng enumeration form-a inziah luh leh ECI-NET-a thun luh hun hawn a ni dawn a, enumeration form thun luh behchhanin July 4, 2026-ah draft electoral roll tlangzarh a ni ang. July 4 aṭanga August 4, 2026 thleng dilna hun hawn a ni dawn a, dilna hrang hrangte September 2, 2026 thleng chinfel hna thawh a ni ang a, September 5, 2026-ah Final Electoral Roll tihchhuah a ni ang.