Râltlânte buhfai tur Minister-in a vailiam

Food, Civil Supplies and Consumer Affairs minister B Lalchhanzova chuan nimin khan Champhaiah raltlan hnena pek tur buhfai a vailiam a; a department chan pisate a tlawh bawk.

Raltlante hnena buhfao pek tur semna leh vailiamna inkhawm hi New Champhaia FCI kudamah buatsaih a ni a; FCSCA Minister chuan buh quintal 4,229 leh kg 5 a vailam a ni. Buhfai hi Champhai district-a khua/veng 43-ah raltlan mi 12,083-te chan tur a ni a, mi pakhatin kg 35 zelin an chang dawn.

B Lalchhanzova chuan, raltlan nih chu hrehawm tak a nih a rin thu leh, awmna tur bakah, ei leh inah an harsa hle ang tih a rin thu a sawi a, "Chung hrehawmnate chhâwk zângkhai turin hetiang ruahmanna hi siam a ni," a ti.

Supply Minister chuan, raltlante'n ṭanpuina dang tam tak an mamawh tih sawiin, tlawmngaihna leh ṭanpui duhna thinlung pu a, an theih ang anga ṭanpuia thlamuan turin Champhai mipui a chah a; sorkar hmalakna hrang hrangte chu mipui tel lo chuan a hlawhtling thei lo tih sawiin, hmalakna hrang hrangah sorkar thawhpui zel turin mipui a sáwm.

Buhfai vailiamna inkhawm hi Champhai additional DC Lalbiakfela'n a kaihruai a, bawrhsap Mohammad Aaquib pawhin thu a sawi.

Minister B Lalchhanzova hian nimin khan department a enkawl - FCSCA, Land Revenue and Settlement, Information & Public Relations leh Legal Metrology pisate a tlawh kual a ni.