Aizawlah Olympic Day buatsaih a ni

Nimin kha International Olympic Day a ni. He ni pual hian Mizoram Olympic Association chuan Aizawlah 'Olympic Day Run' leh 'Plantation Drive' an buatsaih a, Environment Forest & Climate Change minister Lalthansanga leh Sports & Youth Services minister Lalnghinglova Hmar ten an hmanpui.

Olympic Day Run-ah hian sport association 15 aṭangin infiammi 631 telin, Chanmari kawn, Dinthar leh Sikulpuikawn aṭangin infiammite an tlan a, Lammualah an lut khawm. Inkhawm tawi buatsaih a ni a, Mizoram Olympic Association president Robert Romawia Royte-in a kaihruai.

Lalthansanga chuan, Olympic Day puala thing phun ngaih pawimawh a ni chu a lawm thu sawiin, "Environment ṭhatna state-te hi state hausa an ni a, thing phun leh ramngaw humhalh kan ngaih pawimawh deuh deuh a ṭul," a ti a; infiammite tan inzah tawnna, hun vawn dik, mahni inthunnun leh dawhtheihna te ngaih pawimawh a ṭul thu a sawi.

Lalnghinglova Hmar pawhin thu sawiin, Olympic Day puala Olympic Day Run buatsaih ṭhin a ni chu ṭha a tih thu a sawi a; Mizoram chu a hminga Olympic Day lo zawm vetu mai ni lo a, Olympic-ah ngei Mizo infiammi tam zawk an la tel ve ngei a beisei thu a sawi bawk.