NHIDCL-in Mizorama kawng an siam chungchang Chief Minister hoin sawiho

Chief minister Lalduh-oma chuan, June 22, Thawhṭanni khan CM conference hall-ah NHIDCL managing director Dr Krishan Kumar leh hotu dangte a kâwm a, NHIDCL-in Mizorama kawng an siam mek chungchang a sawipui.

Ṭhutkhawmah hian PWD minister Vanlalhlana, EFCC minister Lalthan-sanga, adviser to CM TBC Lalvenchhunga, H Ginzalal leh Dr Lorrain Lalpekliana Chinzah te pawh an tel a ni.

Aizawl - Thenzawl kawng national highway (NH)-a siam turin detailed project report (DPR) siamtu tur zawn mek a nih thu leh, June 2026 thla tawpah tender hawn a nih dawn thu tarlan a ni. Dr Krishan Kumar chuan, kuminah alignment peih an tum thu leh, 2027-ah sanction neih hman an tum dawn thu a sawi.

Vairengte-Sairang kawng NH-06 thawm ṭhat chungchangah, Khamrang-Sairang siam zawh a nih tawh thu te, Kolasib lamah hna thawh mek zel a nih thu leh, kum hmasa lama kawng chhe lutuk vanga harsatna ang kha kuminah chuan a thleng lo tura ngaih a nih thute sawi a ni.

Seling-Tipaimukh inkar NH-a Tuirini lei leh Tuivai lei chu a rang lama siam ṭhat a ṭul thu sawi a ni a; permanent bridge siam turin hun a la ngaih rei dawn avangin tuna lei awm sa chu a rang lama thawm ṭhat phawt ni se, an ti.

Vairengte-Sairang/Aizawl kawng NH thlûr li (four lane)-a siam tura siam hna thawh meka harsatna te, Aizawl-Tuipang inkar kawng (NH) thawh mekte sawi a ni a; harsatnate a rang lama chinfel dan tur sawiho a ni.

Tlabung-Kawrpui-chhuah inkar kawng (NH) chu NHIDCL enkawl tawh tur a nih thu sawi a ni a, "Tihfel thuai ni se," an ti. Thingfal khuaa NH kawng laih vanga biak-in chim leh sikul sawn ngaite sak ṭhatna tura Lunglei DC-in rawtna (proposal) a thehluh chu NHIDCL hotu chuan a enchian tur thu Chief Minister a hrilh.

NH laih tharin a hèl NH hlui ni ta hmun ṭhenkhat, NHIDCL-in an thawm ṭhat (one time improvement) an tih tawhte chu state sorkara hlan a ni dawn a; an la thawm ṭhat lohte chu an siam phawt ang a, an siam hnuah state PWD hnenah an hlan dawn a ni.