SVANidhi Mahotsav buatsaih a ni

Urban Development & Poverty Alleviation (UDPA) department chuan nimin khan Dawrpui Multipurpose Hall-ah khawlaia thil zuar (vendor)-te pual kût, ‘SVANidhi Mahotsav’ an hmang a, Aizawl mayor H Lalremtluanga'n a hmanpui.

SVANidhi Mahotsav-ah hian PM SVANidhi loan vawi hnihna thlenga rûl zo tawh hnenah PM SVANidhi credit card hlan a ni a; PM SVANidhi scheme kaltlanga loan rûl ṭha leh digital payment ti tam zualte hnenah thuchei leh pawisa hlan a ni. Chawhnuah loan latute leh bank lamte nen sawihona hun hman a ni a; PM SVANidhi credit card leh cyber awareness chungchang inzirtirna hun hman a ni bawk.

Aizawl Mayor chuan, mahni sum hmang ringawta sumdàwn a harsat thu a sawi a, "PM SVANidhi hnuaia vendor-te puala loan lak theih hi a hlu hle a ni," a ti a; loan latute chu loan an rulh ṭhat chuan loan dang lak lehna tura puitu tur a nih theih thu hrilhin, rim takin thawk a, hmasawn zel tum turin a fuih.

AMC thar hnuaiah vendor-te leh vending zone zir chiang turin study team din a nih thu sawiin H Lalremtluanga chuan, "Vending registration pek dan te, ṭhutna hmun sawnte leh ṭhutna hmun tur nei lote chungchangah pawh ngaihtuahna kan sêng mek. Ṭhutna awm sa chei ṭhat leh mipui tana dawr nuam theih tur zawka siam kawngah hmalak zel kan tum," a ti.

UDPA director Jacob Lalawmpuia, PM SVANidhi state mission director pawhin thu sawiin, PM SVANidhi chu Covid-19 vanga khawlaia thil zuarte’n an eizawnnaa harsatna an tawh phuhrûkna tura duan a nih thu a sawi a, "Loan leh hamṭhatna dang an dawn theihna tur a ni. Mizoramah PM SVANidhi dawngtu mi 4,459 lai an awm tawh. He scheme hi AMC huam chhungah kalpui a ni a, Mizoram hmun dangah pawh kalpui zel tum a ni," a ti.