KHAWTHLIR

Hmanrua sem

Social Welfare, Women & Child Development minister Lalrinpuii chuan nimin khan Persons with Disability (PwD) Commissioner pisaah upate leh rualbanlote hnenah hmanrua eng emaw zat a hlan. Hman-ruate hi Artificial Limb Manufacturing Company (ALIMCO) leh Mizoram State Commissioner for PwD ten an buaipui leh sem a ni.

UPC ṭhukhawm

Nimin khan Mizoram UPC General Headquarters Office-ah UPC Pastoral Board kum chanve ṭhutkhawm ṭan a ni a, general superintendent Rev. Ngurthanpara Sailo-in a kaihruai. Pastor bial tin monthly report thlirho a ni a, pastor post ruak hnawhkhah chungchang leh thil pawimawh dangte an rel a ni. Vawiin leh naktukah Mizoram UPC Executive Committee an ṭhu leh ang.

Basketball court

Sports & Youth Services minister Lalnghinglova Hmar chuan nimin khan a bial chhunga Tuikual North Middle School-ah basketball court a hawng. Court hi SYS department Grant-in-Aid 2025-26 aṭanga hmuh cheng nuai 15 sênga sak a ni. Minister chuan, "Sorkar sikulah mi an luh duh nan theihtawp kan chhuah zel dawn," a ti.

Theitui siam zirtir

MIFCO chuan nimin khan Suangpuilawna self help group - Lawntlang Juice Extraction Centre member-te chu thei sawngbawl dan hrang hrang, vawn ṭhat dan leh theitui siam dan, khawl hmanga enkawl zui dante an zirtir. Training hi Mizoram State Livelihood Mission ngenna anga buatsaih a ni a, MIFCO Fruit Juice Concentrate Plant, Chhingchhipa supervisor leh operator ten an zirtir a; MIFCO chairman Lalṭhazuala Rawite-in a hmanpui a ni.

Computer inhlan

Rashtriya Gram Swaraj Abhiyan (RGSA) kaltlangin nimin khan Aizawl district bawrhsap Lalhriatpuia chuan Chhanchhuahna Khawpui, Darlawn Vengpui, Khawpuar, Ṭinghmun, Sateek, Sunhluchhip leh Thingsat VC-te hnenah computer leh printer a hlan. Siahaah pawh Mara Autonomous District Council chief executive member M Laikaw-a'n VC 71 hnenah computer a hlan bawk.