BJP leh ZPM ten CADC-ah Sorkar inṭâwm siam an tum

Chakma Autonomous District Council (CADC)-a ZPM MDC (member of district council) leh BJP MDC te chuan nimin khan Chakma Democratic Alliance Legislature Party (CADLP) an din a, sorkar siam tumin hma an la nghal.

ZPM general secretary, CADC enkawltu Vanlalsiama Pachuau leh Mizoram BJP general secretary Delson Notlia te chu an party hotute'n observer atan an ruat a, anni pahnih hriatpuina hnuaiah CADLP din a ni.

CADLP hian an hruaitu tur an thlang a; leader-ah Nirupam Chakma (BJP), deputy leader-ah Kali Kumar Toangchang-gya (ZPM), treasurer-ah Molin Kumar Chakma (BJP) leh secretary atan Supreme Raj Chakma (ZPM) te an thlang.

CADLP hian nimin khan sorkarna siam turin hma an la nghal a, District Council leh Minority Affairs Secretary kaltlangin Governor hnenah lehkha an thehlut a ni.

CADC-ah hian thlan tlin MDC 20 an awm a, BJP-in MDC 10, ZPM-in MDC pakua leh MNF-in MDC pakhat an nei a ni.