CM hoin Police ardali tihtlem ṭha an ti

Mizoram Resource Mobilization Committee (MRMC) chu nimin khan chief minister Lalduhoma kaihhruaiin CMO Conference Hall-ah an ṭhu a; sum leh pai renchem nan Mizoram Police officer-te’n orderly (ardali) awm zat chu hmun thuma ṭhena hmun khat velah tihtlem an rawt.

Ṭhutkhawmah hian Health ministers Lalrinpuii leh Commerce & Industries minister F Rodingliana bakah, MRMC vice chairman Haukhum Hauzel leh member-te an tel. Police officer-te’n ardali an kawl mek 346 chu 118-ah tihtlem ṭha an ti a, an rawt a ni. Hei hi sum leh pai renchemna bakah, Police department-a thawktute daihzai zawka sem darhna a nih dawn thu an sawi.

An thu ngaihtuah zingah, Mizoramin a hranpaa high court a neih theih dan tur a tel. MRMC Sub-Committee on Administrative Reforms chuan May 27, 2025 khan a hranga high court neih a rawt tawh a, hei hi Mizoram Peace Accord 1986 bawhzuina a nih tel thu sawi a ni.

Sorkar kalphung fel leh chak zawk a awm theih nan district administration chak zawk din a pawimawh an ti a; DC office tihchakna atan district tina District Rural Development Office (DRDO)-te chu DC office-a Planning & Development Wing anga zawi zawia leh a ṭul niin an sawi. DC office-a thawktute (manpower) tihchak a ngaih avangin sorkar inrenchemna hre reng chungin thuam chak dan turte MRMC Administrative Reforms Sub-Committee-in lo ngaihtuah se, an ti.

MRMC THU NGAIHTUAH DANG
* Mizoram sorkara thawk doctor-te'n dik taka non-practicing allowance (NPA) an lak theih nan monitoring system changtlung tak siam.
* Mipuite'n sorkar aṭanga service an dawn - 'Right to Public Services Act, 2015' hnuaia service 197 tarlante chu a hun takah mipuite'n an hman theih nan ṭha zawka vil.
* Zuangtui Industrial Estate chhunga industrial plot dawngtute'n a nihna ang taka an hman theih dan tur.
* Balu leh lung aṭanga chhiah lak belh theihna tur.
* Sorkar inrelbawl dan ṭha zawk neih dan tur leh sum inrenchemna lam.