Sorkar leh Synod-in inremna an ziak; Synod-ah GAC building hlan a ni dawn

Sikulpuikawna Government Aizawl College (GAC) building chu Mizoram sorkarin Mizoram Presbyterian Kohhran hnenah a hlan dawn a; nimin khan Planning & Programme Implementation commit-tee room-ah Mizoram sorkar leh Mizoram Synod ten inremna thuthlung, Deed of Agreement an ziak.

Deed of Agreement-ah hian sorkar lamah Higher & Technical Education (HTE) department aiawhin HTE secretary Dr Lalrozama hming a ziak a, Mizoram Synod aiawhin moderator Rev. John Raldosanga'n hming a ziak.

Inremna hriatpuitu atan sorkar aiawhin HTE joint secretary K Lalhmangaihzuala leh director Lalṭanpuia ten hming an ziak a; Synod secretary Rev. B Zohmangaiha leh senior executive secretary Rev. VL Luaia Hranleh ten hming an ziak bawk.

Inremna ang chuan, GAC building hlutna (depreciated value), sorkar dan anga chhût chhuah tawh Rs 3,18,92,300 chu Mizoram Synod-in Mizoram sorkar (HTE department) hnenah a pe dawn a; pawisa an pek aṭangin GAC building chu Mizoram Synod kutah a awm ang. Building luahtute awm zui zel dan tur chungchang pawh inremna lehkhaah ziah lan a ni.

Inremna ziahnaah hian HTE minister Dr Vanlalthlana chuan, inremsiamna thuthlung ziah a ni chu lawmawm a tih thu sawiin, GAC building hman zui zelna turah zirna atana hma-sawnna ṭha zawk a thlen ngei a beisei thu a sawi.

GAC building inhlanna tura thâ leh zung sengtu - Drafting Committee member te, HTE department hotu te, Mizoram Synod Presbyterian hruaitu te, GAD, PWD, Law & Judicial leh Finance department-a thawktute zawng zawng chungah a lawm thu Dr Vanlalthlana chuan a sawi bawk.

Thuthlung ziahnaah hian sorkar aṭangin HTE under secretary Zahmingthanga, GAC principal Lalbiakzuala leh mi pawimawh dangte an tel a; Mizoram Synod aṭangin executive secretary Rev. Dr Rosiamliana Tochhawng leh hruaiut dangte an tel.

January 7, 2026 khan HTE Minister kaihhruaina hnuaiah GAC building inhlan chungchang ngaihtuah a ni a, Draft Agreement buatsaihtu tur Drafting Committee din a ni, Committee chuan March 23-ah Draft Agreement (final draft) an peih a; Law & Judicial leh Finance department-te pawmpuina lak a nih hnuah Deed of Agreement ziah a ni ta a ni.

GAC hi August 25, 1975-ah din a ni a, kum 1989-ah sorkarin a la (provincialise). A tirah chuan hmunhma nei mumal loin hmun hrang hrangah zirna kalpui a ni ṭhin a; Mizoram sorkarin Sikulpui leh Sikulsen te a enkawl laiin Sikulpui kawtah GAC building sak a ni. Sikulpui hi sorkar chuan May 29, 2019 khan Mizoram Synod hnenah a lo hlan lêt tawh bawh. GAC hi tunah chuan Mualpuiah an awm tawh.