Rajya Sabha-a Mizoram aiawh tur vawiinah thlan a ni dawn

Mizoram aṭanga Rajya Sabha member (MP) tur vawiin hian Assembly House building-ah thlan a ni dawn. Zing dar 9-ah vote thlak hun hawn a ni ang a, tlai dar 4 thleng vote thlak theih a ni dawn a; vote thlak zawh tlai dar 5-ah vote chhiar nghal a ni ang.

Tun ṭuma Rajya Sabha MP thlan turah hian candidate pahnih an awm dawn a, chu'ngte chu ZPM candidate K Laltluangkima leh MNF candidate Zothansangi Hmar te an ni.

Mizoram Rajya Sabha inthlanah hian MLA-te'n vote an thlâk dawn a; tuna political party-te'n MLA an neih zat chu - ZPM-in 27, MNF-in 10, BJP-in pahnih leh Congress party-in pakhat a ni. Mizoram MLA-te vote hlutna (vote value) chu 100 zel a ni a, tling tura vote hmuh ngai zat chu 2,100 (MLA 21) a nia sawi a ni.

Mizoramah Rajya Sabha MP inthlan ṭum kua a lo awm tawh a, mi paruk thlan tlin an ni tawh. Hiphei (INC) leh Lalhmingliana (MNF) te chu a záwnin ṭum hnih (kum 12) ve ve thlan tlin tawh an ni.

Rajya Sabha MP ni lai K Vanlalvena chu July 18, 2026-ah a hun a tàwp dawn a, July 18, 2026 hmain kumina MP tura thlan tlin chu MP atan lâk luh a ni ang.

Kum 2020 khan June 19-ah Rajya Sabha MP thlan a ni a, candidate pathum - MNF aṭangin K Vanlalvena, INC aṭangin Dr Lallianchhunga leh ZPM aṭangin B Lalchhanzova te an ni a; MLA-te'n vote an thlak vek a ni.