KHAWTHLIR

Thisen pe

KṬP, Model Veng Branch chuan an din champha pualin June 13, Inrinni khan an kohhran hall-ah thisen pek an huaihawt a, Synod Hospital tan thisen unit 33 an pe a, petute mipa 32 leh hmeichhia pakhat an ni. ṬKP, Cherhlun Bial leh NSS Cherhlun Higher Secondary School pawhin Lunglei Civil Hospital tan Cherhlun PHC-ah thisen unit 70 an pe a, petute mipa 61 leh hmeichhia pakua an ni.

Computer sem

Local Administration department chuan June 12, 2026 khan Mamit DC conference hall-ah mamit district-a VC-te tana computer sem inkhawm an buatsaih a; RGSA scheme aṭangin VC 36 hnenah computer sem niin, district bawrhsap Suvigya S Chandra-in a hlan. Bawrhsap chuan, computer dawngtu VC-te a lawmpui thu sawiin, ṭangkai taka hmang turin a chah.

MUP jubilee lawm

MUP, Lunglei Chanmari unit chuan June 12, 2026 khan Lunglei Chanmari YMA Hall-ah golden jubilee an lawm a, Lunglei Municipal Council vice chairman K Lalrinawma'n a hmanpui. K Lalrinawma hian MUP, Chanmari unit hnenah carrom board a pek bakah, jubilee lawmnaa tel kum 85 chin hnenah sihdêt (torchlight) a pe a ni.

LC draft roll

Aizawla local council by-election neihna tur LC pasariha draft electoral roll chu June 12, 2026 khan Aizawl additional DC Vanlalrova'n a tlangzarh. Durtlang, Zotlang, Luangmual, Dawrpui Vengthar, Bungkawn, Republic Veng leh Salem Vengah te LC seat pakhat ṭheuh a ruak a; by-election neih a ngaih dawn avangin, electoral roll ennawn tur a ni a, belh leh paih ngaite June 24, 2026 thleng tih theih a ni ang.

Puanṭhui zirna khâr

Khawzawl RD Block hnuaia self help group (SHG) member-te tana Bethany Society, Shillong-in June 3, 2026 aṭanga puanṭhui zirna a buatsaih chu June 12, 2026 khan Khawzawl DPRC-ah khâr a ni. Khârna hun hi NEIGRIHMS Radiology department-a HoD Dr C Danial-a'n a hmanpui a; training zote hnenah USHA puanṭhui khawl leh Classical SILAI School signboard hlan a ni.