NITI Aayog leh NE CM-te inkawmnaah CM-in Mizoram hmasawnna tur a sawi

NITI Aayog hotute leh hmarchhak state chief minister-te leh chief secretary-te chu June 12, 2026 khan New Delhi-a NITI Aayog pisaah an inkâwm a; chief minister Lalduhoma pawh telin, Mizoram sorkar mamawh leh hmarchhak bialin chak zawka hma a sawnna tur thilte a sawi.

CM Lalduhoma chuan, Mizoram tana all India service cadre hran neih a ṭul thu sawiin, state hmasawnna atana cadre hrang neih a ṭulna leh a hlâwkna turte a sawi. Hemi chungchangah hian Arunachal Pradesh chief minister Pema Khandu nen hma an la dun a ni.

Thenzawl Peace City din tura hmalak mekna sawiin Lalduhoma chuan, Peace City hmasawn zelna tura theihtawp chhuahpui zel turin NITI Aayog hotute a ngen. High Level Task Force on Northeast Economic Corridor convener a nih angin Thailand thlenga kal tur India-Myanmar-Thailand trilateral highway chu tihhlawhtlin vat a ṭul thu leh Kaladan Multi Modal Transit Transport Project chu tikhawmuang tawh loa a hun taka zawh ngei ṭha a tih thu a sawi.

Mizoram CM hian NITI Aayog member-ah hmarchhak mi Dr Joram Aniya dah a ni chu lawmawm a tih thu leh, tinzawn neia hmarchhak state hruaitute tana meeting buatsaih a ni chu ṭha a tih thu a sawi. Mizoramin tourism lama hmasawnna tur hrang hrang a neihte bakah Sports department hnuaia Empowering Mizoram Sports kalpui mek dan leh hmasawn zelna tur kawng hrang hrangte a tarlang bawk.

Inkawmnaah hian NITI Aayog CEO Nidhi Chhibber chuan kal khawmte lawmna thu a sawi a, vice chairman Ashok Kumar Lahiri chuan inkawmna an buatsaih chhan leh an ngai pawimawhte a sawi a ni.

CM LALDUHOMA SAWI DANG :

☑ Aspirational Districts & Aspirational Blocks programme hnuaia hmarchhak bial, a bikin Mizorama an huam chinte ennawn a ṭul.

☑ Aspirational Districts & Blocks hman mek tehfungte hian tlang ram leh ramri hrûla awm state dinhmun dik tak a pho chhuak tâwk lo.

☑ Centrally sponsored scheme kaihhruainate hi hmarchhakah a nih ang anga hman rem lo tam tak a awm a, tlang ram mila siamrem a ṭul.

☑ Mizoram Ginger Mission hnuaia sawhthing sawngbawlna din turte tihhlawhtlin vat a nih theih nan NITI Aayog puihna kan mamawh.

☑ Hmarchhak state-te tana 10% Gross Budgetary Support sorkar laipuiin a duan hi a ṭangkai a, hemi hnuaiah hian funding hi a nihna ang taka state-te pek a, state sorkarin scheme a duan leh hmasawnna hna pawimawh bikte thawh nana hman theih tura siam a ṭul.