Speaker-in Sesawngah Zo Ní a hmanpui

Assembly speaker Lalbiakzama chuan June 13, Inrinni khan a bial Chalfilh chhunga Sesawng khelmualah Sesawng Joint YMA buatsaih 'Zo Ní' (Cultural Day) a hmanpui a; tlawmngaihna leh aia upa zahna nunpui tlat turin kal khawmte a chah.

Lalbiakzama chuan, mahni hnam zia (culture) leh nunphung (tradition) chu hnam innghahna lungphûm pawimawh a nih thu a sawi a, "Hnam hrang hrang awm khawmna India ramah hian kan hnam nun kan vawn tlatna hian kan ram mawina leh ropuina a tizual a, hnam dang laka kan zahawmna a ni. Pi leh pu aṭanga kan lo inhlan chhawn tlawmngaihna leh aia upa zahna te hi kan nunpui tlat tur a ni," a ti.

Pipu zai (folk song) leh hnam làm (folk dance) te, Mizo thawnthu (folk tale)-te leh hnam thuam (traditional dress)-te chu ṭhangtharte hnenah hrilhhriat reng a pawimawh thu sawiin Lalbiakzama chuan, "Tun hnaiah India ram chhung leh pawn aṭangin khualzin tam takinn Mizoram an rawn tlawh a, social media-ah video leh thlalak tarlangin, Mizo hnam zia leh nunphung a ṭha zawngin an tarlang nasa hle a ni," a ti a; chungte chu Mizorama chengte ṭanrualna vang a nih thu a sawi.

Sesawng Zo Ní-ah hian chawhmaah naupangte nen hun hman a ni a, chawhnu lamah YMA branch tinte inelna leh concert buatsaih a ni.