MUHCS 2.0-ah damdawi-inte hnenah cheng vbc 22.7 pek a ni tawh - Lalrinpuii

Mizoram State Health Care Society (MSHCS)-in kumina ISO (International Organization for Stan-dardization) certification an hmuh leh AB PMJAY Award an dawn chu nimin khan SAD conference hall-ah Health minister Lalrinpuii hoin lawm a ni. Minister chuan, MUHCS 2.0-ah damdawi-inte hnenah cheng vbc 22.7 pek a nih tawh thu a sawi.

MSHCS chuan Mizoram Health Systems Strengthening Project puihnain ISO 9001:2015 hmuh tumin hma a la a, United Registrar of System-in chi hrang hranga an endik hnuah February 18, 2026 khan ISO 9001:2015 certification an hmu.

National Health Authority aṭangin MSHCS chuan January 2026 khan AB PMJAY beneficiary enrolment-ah Best State Award a dawng a; Mizorama ABPMJAY hmang thei tur chhungkaw tina mi pakhat talin Ayushmena Card (golden card) an nei vek tawh a ni.

MSHCS chuan Nation-al Health Authority aṭang vêkin April 2026 khan Highest Percentage of Bio-Authentication Award 2025-26 an dawng bawk.

Health Minister chuan, MSHCS-in ISO certification leh National Health Authority aṭanga award pahnih an dawng chu CEO leh thawktu dangte inpekna vang a nih thu a sawi a, "MUHCS (Mizoram Universal Healthcare Scheme) hi Zoram mipui tana chhenfakawm a nih zel theih nan sorkar chuan thâ thlah loin hmasawnna tur kawng a dap chhunzawm zel dawn," a ti.

MUHCS 2.0 hman ṭan ni, April 1, 2026 hnu lamah damlo enkawlna senso atan damdawi-inte hnenah cheng vbc 22.7 pek chhuah a nih tawh thu Lalrinpuii chuan a sawi a; chungte chu Mizoram chhunga inenkawlna atan cheng vbc 13.45 leh Mizoram pawna inenkawlna vbc 9.2 a ni.

HFW Minister chuan, MUHCS atan kum 2025-26 khan cheng vbc 50 budget-ah dah a nih thu sawiin, "Kum 2026-27-ah cheng vbc 130-ah a tihpun a ni. A hun taka damdawi-in hnena bill pek hi sorkarin a ngai pawimawh a, khaihlak awm loa bill pek zel a nih theih nan sorkar chuan theihtawp a chhuah," a ti.

Lalrinpuii chuan, MUHCS chu mipui tana thlamuanpui tlak a nih zel theih nan thláwp tur leh thawhpui turin Mizo mipui a ngen bawk.

Inkhawm hi HFW secretary K Lal-rinzuali'n a kaihruai a, MSHCS chief executive officer Dr Lalhriatzuali Ralte-in MSHCS-in lawmman a dawn dan leh MUHCS chungchang a sawifiah. World Bank task team atangin Dr Navneet Kaur-i'n thu a sawi a; MUHCS chungchanga Reels Competition-a lawmman dawngtu - Rody Lalthanzuali, Lalhminghlui leh Vanlal-chhuanga hnenah lawmman hlan a ni.